Sebahat Tuncel: Mi a çapole daye dewlete ro

Aktîveteya newroze de hêrişê polîsî ra tepîya parlamentera kurde Sebahat Tuncel Silopî de çapole daye ju (yew) komîserî ro. Dima, rexneyê serekwezîrê Tirkîya ser o Tuncel cewabêde nîyanên da: “Bi o insan meseleya mina tayebetî çin a.”

Sebahat Tuncel ajansê xeberan ANF rê cewabê persan da. Tuncel va ke Silopî de des hezarî ra zêde kesî amey pêser û badê ke mîtîng qedîya. xafil de polîsî hêrişê însanan kerd. “Xafil de ma ke peyser qayît kerd, polîsan hêrişê însananê ma kerd, bombayê gazî eştî. Perray însananê ma ser. Ma ke vejîyayîme teber, welatê xo de her rey duştê bombaya gaze û cop yenîme. Eke ma şîyîme leyê însanê xo, zafê înanî dirbetin bîy, cinîyî war de bîy. Bi no hêrs ez şîya leyê polîsî ke pers bikerîne, nê nîya se kenê û wa ma ra çi wazenê.”

Tuncel ra medyaya tirke tek çapola aye de eleqedar bena, labelê zulmê ke kurdan ser o yeno kerdene, meseleyade muhîme nêasena. “Herektê mi tabî qayilê dewlete nêşî. Ê nika pers kenê, senî beno ke ju (yew) cinîka kurde nîya xo erzena ver. Êndî ma ameyîme o nuqte ke êndî bes o.”

No serebût ra tepîya medya û partîyanê tirkan bi rexneyanê giranan ramitê Sebahat Tuncel û Bengî Yildizî ser. Serekê partîya MHP Devlet Bahçelî şîrove kerd ke “Hesabê çapola ke ameye dayene dewlete ro, do bêro dayene. Destî do bêrê şikitene.” Tuncel naye ser o va ke “No vate û vengdayîşê lînçî yo. Qet faydeyê xo Tirkîya rê çin o. Wa henî fehm beno ke na dewlete ju (yew) memurê polîsî ya kî ju (yew) burokrat de yena pêra. Parlamentera ke no welat de se hezarî rey girewtê, wa dewlete temsîl nêkena. Ez şima ra vajî, mi nêwaşt ke a çapole bidîne ê memurî ro, wa bidîne dewlete ro. O memurê polîsî tena memurê polîsî yo.”

Sebahat Tuncel serra 2007 de Îstanbul ra bi 89.000 reyan ra ameybî weçinitene wekîle. O wext de hepis de bîye. Tuncel 1975 de Melêtî de ameya dinya û heyatê xoyo sîyasî partîya DTP de dest kerdîbî ci. 2006 de ame eştene bi hepis û 9 aşman ra tepîya semedê weçinitiş ra bîye azade.