Referandum Dewamê Hereketê Pêro Serewedaritişan o

Referandumê 25. êlule rê new rojî mendî. Roja referandumî ya ke nêzdî bena, heyecan û coşê kurdan zî berz beno. Herçiqas ke no referandum yew parçeyê Kurdîstanî de virazîyeno zî, mesele meseleyê qederê heme kurdan o. No sedem ra netîceyê referandumî do tesîrê prosesesê îstîqbalê pêro parçeyênê kurdan bikero.

Heme dinya pê zaneno ke no referandum seba zelalîya meylê kurdan o. Yanî, gelo kurdê “Başûrî” welatêko xoser wazenê yan nêwazenê, yo.  Seke Barzanî zî vano: “No referandum waştişê xoserî nîyo. No referandum yew wesîle yo. Wesîleyê xoserîya Kurdîstanî yo. Hedefê ma referandum nîyo. Hedefê ma xoserîya welatê ma ya. La der û cîranê Kurdîstanî naye rê zî qelqelîyenê û tehemulê nê referandumî nêkenê.

No referandum yew wesîle yo

Derheqê nê referandumî de nê hîrê aşmî zaf çîyî ameyî vatiş û ameyî nuştiş. Ez nêwazena nê çîyê ke ameyî nuştiş û vatiş, înan tekrar bikera. Ê ke meraq kenê, eşkenê bivînê û biwanê. Esasê xo de çîyê ke der û cîranî vanê, ez hende muhîm nêvînena. Çunke bi des serran o ke nê der û cîranî, Îraq, Îran, Sûrîye û Tirkîya, sey mal û milkê babê xo Kurdîstan werdo û kurdî zî sey bizêkê pîyê xo îdare kerdê û hema zî wenê û îdare kenê! Û wazenê heta-hetanî zî borê û îdare bikerê! Kurdê ke sereyê xo wedaritê, bi şeklêko bêînsafî, bêedelatî û bêwijdanî vat req û da sereyê înan ro. Ê zî hol zanenê ke netîceyê nê referandumî do bibo yew çuwaya qaline û înan rê bilîlîkno. Û tersenê ke no referandum seba parçeyanê bînan bibo domîno û ro ser înan biqelebîyo! Coka duştê nê referandumî de vindenê û nêwazenê no referandum virazîyo.

Çîyo ke ez muhîm vînena û bi baldarî goştarî û temaşe kena no yo: mîyanê ma kurdan de tayê kesî muxalefetîya nê referandumî kenê û sey fekê nê der û cîranan qisey kenê! Nê qîseyî merdimî dejnenê û qehernenê! Halbukî no referandum dewamê heme serewedaritişanê kurdan o! Dewamê tarîxê serewedaritişê Barzanîyan o, yê Şêx Ehmedî yo, yê Şêx Ebdilselamî yo, yê Mustefa Barzanî yo ke bi des hezeran şehîdî dayê! Dewamê serewedaritişê Şêx Seîdî yo, dewamê serewedaritşê Seyîd Rîzayî yo, dewamê serewedaritşê Mehmud Berzencî yo, dewamê Komara Mehabadê Qazî Mihemedî yo… No referandum qonaxê heme serewedaritişan o. Nê referandumî ra dima zî do helqaya xoserî bêro. Coka ganî kurdî ehemîyet bidê nê referandumî û qedr û qîymet bidê ci.

 dewamê serewedaritşê Seyîd Rîzayî yo

Mi gore sebebê muxalefetîya nê kesan sebebêko maqûl û durist nîyo. Tayê kesî vanê, verê referandumî lazim o ke konferansê yewîtîya kurdan bivirazîyêne. Tayê vanê, no qerar qerarê Parlamentoyê Federalî nîyo. Tayê vanê, bingeyê nê referandumî çinî yo, ci rê binge nêvirazîyo.

Çend rey mi televîzîyonan de fekê Mesûd Barzanî ra eşnawit ke vano “No referandum yê Başûrê Kurdîstanî yo. Ma mecbur mendê ke ma qerarê referandumî girewt. 2003 ra nato hukmatê Îraqî sozo ke dano ma, sozê xo nêano ca. Nê di serrî yê zî hîseyê petrolî yo ke heqê ma yo, nêdanê ma. (…) Ma sere de va ke ma zî Îraqêko federal, demokratîk û edîl wazenê. Ma zî wazenê ke heme şarê bindestî yê Îraqî bi tewrêko demokratîk bêrê îdarekerdiş. La çi heyf ke roje bi roje no hukmat demokrasî ra dûrî beno. Vera-vera ver bi dewrê Sedamî hereket keno. Ma nê hereketî seba xo kiştiş vînenê. Ma tarîxê xo ra dersêka girde girewta. Ma êdî nêxapîyenê. (…) Ma mecbur mendê ke ma no qerar girewt. Û ma do nê qerarê xo yê referandumî bîyarê ca…”

  ganî heme parçeyanê Kurdîstanî paştî bidayêne nê referandumî

Xora, nê di serrî yê ke Mesûd Barzanî behsa referandumî keno û vano “seba xoserîye ganî ewilî referandumêk bêro viraştiş”. Roja 07.06.2017 de mîyanê hewtês serekanê partî û cematanê ke ha yê parlamentoyê Kurdîstanê Federalî de, fikrê referandumî munaqeşe bî û badê nê munaqeşeyan qerarê referandumê 25. êlule ame dayîş. Tena di partîyî, Goran û Komele beşdarê nê kombîyayîşî nêbîyî.

Ewro no qerar qerarêko meşrû yo û heq o! Mi gore ganî heme parçeyanê Kurdîstanî de kurdî biweriştêne lingan ser û paştî bidayêne nê referandumî. Hîna zaf zî medyaya kurdan timî na babete ser o bivindertêne û televîzîyonanê xo de programî biviraştêne. La çi heyf ke hetanî ewro vengêko tesîrin, vengêko pêt kurdanê teberê başûrî ra nêvejîyayo. Zaf heyf o ke televîzîyonanê kurdan ê teberê başûrî seba nê referandumî cayê xo ra nêlebetîyenê û hewl nêdanê xo û na babete ser o xeberan nêvirazenê. Hetanî ke sey vengûvajî zî ca nêdanê na babeta referandumî! Ewro rojeve rojeva referandumî ya. Ewro roje roja propogandayê referandumî ya. No wezîfe zî wezîfeyê ma heme kurdan û wezîfeyê heme medyaya kurdan o.