Gonîya mi de qelema destê to ra. Dayê ra dime kî kedkarê ke bi kirmanckî nivisnenê gonîya mi de qelema destê înan ra bone kî. Ez nîya vacî ke wa belko zerê mi rehet bo. Ju qeleme est a ke rindekîya ziwanê kirmanckî bêqûsûr, bêhîle ana re zon.
Raştî kî qelema destê xo ano ra ziwan, tivana belko mordem de hurdî hurdî qeseykena, mordem de huna, mordem de şa bena û kêyfê mordemî kî êno ke mordem nusteyê qelema nîya nazikê zere û can ra biwano. Mordem ke wendena ju meqaleyê ra, wendena ju şîîrê ra, wendena ju hêketê ra ya kî ma vacîmê wendena ju romanî ra … kêyf û zewq guret, o taw mordem nêwazeno ke pêynîya xo bêrone.
Ti Xizirê kalî kena ke rew rew binivisnê! Ma nê nustanê xoyê nazikan ra marum meverde. Ma, vêşan û têşanê rindekîya ziwanê kirmanckîyî mê. Çunke, to nustanê xo neqeşnen a, tivanê belko qelema destê to ra hemgên palakîno. Her çekuya nustê to ra mordem tam cêno, gonî cêno, ro cêno, can cêno û êno ra xo. Ez çitaw nustê de to biwanî mi rê zê şerbetî êno, mi rê zê melemî êno.
No derheq de nuştox Mehmud Nêşite kî ju nustê xo de: “… La ewro zaf nuştoxê ma zî estê ke merdim nuşteyê înan ra tahmê ziwanî gêno. Wexto ke merdim hunerê înan, nuşteyê înan waneno, merdim nêwazeno ke nuşteyê înan biqedîyo. Merdim tahmê nuşteyê înan de tahmê şitê maya xo hîs keno.” nîya vat bî. Raştî kî ez no husus de heqe dana Birêz Mehmud Nêşite. Mordem ke ju nuste bi kirmanckî wend gere tamê ê ziwanî kî bicero.
Kûl û bîrînê ziwanê kirmanckîyê ke heyanî nika nîyamay bî têrapîştene, ê kûl û bîrînê ziwanê kirmanckî êndî nika hetê tayê nuskaranê man ê hêcayan ra hedî hedî melem benê û êne terapîştene.
Qet bêguman emeg û kedê her nuskarê kirmancî cayê xo lêwe mi de taybetî o. Kes wa zerê xo nêcero. Ez qedr û qimet dana emeg û kedê her nuskarê kirmancî. Nusteyê ke bi kêyf weşîye û zere û can ra wanena, nînan ra juyî kî nustê Birêz Alî Beytaş yê. Weş û war bo, dest û payê êy caran çetine nêvîne wa qelema destê êy kî ma rê nîya rindekîya ziwanê kirmanckî ra marum nêvirdo. Çunke, qelema destê êy ra hemgên palakîno.
Çekuyanê nustê xo juyê bi juyê çîneno we. Her ju çekuya ke Alî Beytaş nustê xo de nusneno, zê kemera çengeyî cayê xo de nîşenê ro. Dês o kemirin, ke bêkemera çengeyî, bêxîçe, bêxerc ke ame viraştene, êy dêsî ra wayîr xêrê nêvîneno, o dês rew rijîno. Lê Alî Beytaş ûstayê karê xuyo. Dês o ke qelema destê nustox Alî Beytaşî guna piro, o dês henî rehet rehet nêrîjîno.
Yane heyanî ke ziwanê kirmanckî hetê nuskaranê zê Alî Beytaşî ra ame nusnayene, vînd bîyene û merdena ê ziwanî kî çîn a.
Wusênê Gestemerde
Berlin, 17.03.12
