Ocalanî caverdayîşê çekan waşt, KCK cewab da

Partîya Demokratîk a Şaran (HDP) û hetkarê serekwezîrê Tirkîya Yalçin Akdoganî vizêr dolmabaxçe de ameyî têlewe. Kombîyayîş ra dima heyetê HDP û Yalçin Akdoganî vilaweka muştereke daye. Na reya verêne bîye ke kombîyayîşêde nîyanên ame viraştene.

Xebere na bîye ke serekê Partîya Karkeranê Kurdîstan (PKK) Abdullah Ocalan wazeno ke partîye heta wisarê emserî çekanê xo caverdo. Coka PKK yew kongreya îstîsnayî bivirazo. Kombîyayîş de Akdogan, wezîrê karanê zereyî Efkan Ala, serwekîlê grûb ê AKP Mahîr Unal, serwekîlê grûb ê HDP Pervîn Buldan, Îdrîs Balûken û parlamenterê Îstanbulî Sirri Surreya Onder beşdar bîyî. Vilaweka verêne hetê Onder ra ame dayene.

Parçeyê vilaweke de Onderî vateyê Ocalanî neql kerdî: “Hedefê ma yo bingeyên o yo ke ma prosesê nê pêrodayîşê 30 serran bi raya aştîye bîyarîme yew çareyo demokratîk. Seba ke ma qerarêde stratejîk û tarîxî seba caverdayîşê mucadeleyê çekdarî bidîme, ez PKK aşmanê wisarî de kongreya îstîsnayî rê silayî kena. Nîyetê na silayîye beyanê caverdayîşê mucadeleyê çekdarî û herinda ci de ver bi sîyaseto demokratîk şîyen a.”

Seba çareserîye des maddeyî

Dima, Onderî des maddeyê Ocalanî seba çareserkerdişê prosesê aştîye wendî:

1. Sîyaset û muhtawaya demokratîke
2. Tarîfkerdişê rehendanê neteweyî û cayî yê çareserîya demokratîke
3. Huqûq de temînatê hemwelatîya azade
4. Rêxistinbîyayîşê têkilîya sîyasetê demokratîkî, dewlete û komelî
5. Rehendê sosyo-ekonomîkî yê prosesê çareserîye
6. Awanîya asayîşî ya newîye ke raya prosesê aştîye kena ra
7. Temînatê huqûqî seba çareserkerdişê problemananê cinî, kultur û dorûverî
8. Temînatê mekanîzmaya têduşte û demokratîka pluralîste bi raya mefhûmê nasnameyî
9. Tarîfkerdişê komara demokratîke û welatê muşterekî, temînatê demokrasîya pluralîste bi raya huqûq û qanûnê bingeyî
10. Yew qanûno bingeyî yo newe ke tede pêro nê hemle û vurîyayîşê demokratîkî ca gênê

Wendişê maddeyan ra dima Onderî va ke: “Ma sey heyetê HPD venga pêro dor û verê demokratîk û aştîwazî danîme, bêrê ma pîya qewet bidîme nê muzakere û merhela çareserîye. (…) Heta ewro ma qet hende nêzdîyê aştîye nêbîyîme. Kam ke hetê aştîye gêno, wa pîşta xo şano ma ke ma pîya biresîme armancê xo.”

Qiseykerdişê Onderî ra dime hetkarê serekwezîrê Tirkîya Akdoganî kî qisey kerd va ke “HDP vizêr Îmrali de ame têlewe. (…) Ma reştîme merhelêda muhîme. Seba ma îzehê sîyasetê demokratîkî ke lez gureyê caverdayîşê çekan beno raver, muhîm o. Ma qanûno bingeyî sey firsendo muhîm seba çareserkerdişê problemêde zafkokin û kronîk vînenîme. Tirkîya ke problemanê xo yê bingeyênan caverdo, na dinya de resena rewşêda pête. Ma pîya Tirkîya yîme. Her çî seba Tirkîya.”

KCK: Gamê ma goreyê gamanê AKP yenê eştene

Çi esto ke ewro Komê Camatanê Kurdîstanî (KCK) cewabê waştişê caverdayîşê çekan da. Panc rîpelan de hemserekîya KCK da zanayene ke seba çareserîye prosesê aştîye hukmat ra çi pawenê.

Seba KCK beyanê kongreya îstîsnayî gamêka tarîxî ya. Labelê gamê ke nika ra yenê eştene, goreyê gamanê partîya hukmatî AKP yenê eştene. Aye ra kî teber KCK tayê waştişê xo ardî ziwan. Nê waştişan ra yew o bî ke “Paketê Asayîşê Zereyî” bêro peyser antene. “Nêke no duştê hemleya demokratîzekerdişî de vindetiş o.” Boyna, yeno waştene ke Ocalan heyetê KCK de bêro têlewe. Seba ke merdim bireso merhela muhîm a prosesê aştîye, gerek desinde heyetê muzakereyan bêrê viraştene. KCK da zanayene ke ê gamanê AKP bi baldarî taqîb kenê. “Eke AKP sozê xo de nêvindeno, bellî yo ke no weçînitişan ra ver tena yew stratejîya raygirewtişî ya.”

CaverdAyîşê Çekan Çareserkerdişê mesela kurdan de girêdaye yo

Vilaweka KCK de kî ame dayene zanayene ke “Ma ke newroza 2013 ra bi nat adir birna, ma ke duştê pêro viraştişê qereqol, awbend û rayanê eskerîye de, duştê tewqîfkerdiş û kiştişê dewlete de hîna ma aştîye nêxeripnaye, no musneno ke ma proses çiqas ciddî vînenîme. (…) Nîyetê caverdayîşê mucadeleyê çekdarî, gamanê AKP ke mesela kurdan senî hel kena û Tirkîya senî demokratîze kena, înan de girêdaye yo.”