Statîstîko newe ra gore kêmîbîyayîşê nufusê Dêrsimî dewam keno. Viraştişê awbendan, operasyonê eskerîye û sebebê ekonomîkan ra dêrsimijî welatê xo terk kenê.
Goreyê 2009 nufusê Dêrsimî ju (yew) serre de 8% bîyo kêmî. Nufusê 2009 bi 83.061 ra emser gina 76.699 ro. Gerek no lewîyayîşo girs bêro analîze kerdene, çike normal de hûmara 8 % nîşanê sebebanê xususî dana. Na hûmare ra gore Dêrsimî kî zereyê şaristanan de ke nufusê înan benê kêmî, cayo juyin (yewin) girewto. Dêrsim ra teber Cankîrî û Ardahan de kî nufusî zaf bîyê kêmî. Tirkîya de nusuf tewr zaf Bîlecîk, Isparta û Erzingan de beno zêde.
Ju (yew) malimê dêrsimijî kêmbîyayîşê nufusî ser o va ke “Ma besenêkenîme no durum rind fehm bikerîme. Hetê ra hûmara esker û polîsan emser bîye zêde û xeylê wendekarî amey şaristanê ma. Wa se bîyo ke nufus bîyo kêmî. Ma henî zanenîme ke viraştişê awbendan û zêdîyayîşê eskeran ra şarê ma şono teber. Ma îman kenîme ke viraştişê awbendan ra tepîya Dêrsim beno wêran. Mamekîye bi esker, tarîkat û wendegehan asîmîle beno û dewî-mewî êndî benê tal (tol).”
