Tirkîya de kurdî hîna besenêkenê ke nameyanê kurdî domananê xo ra nê. Çêyê (Keyeyê) Ercanan waşt ke nameyê “Dêrsim”î no domana xo ra, labelê Dadgeha Huqûqî ya Bakirkoyî no waştiş qebul nêkerd.
Pîyê domane Xidir Ercan serra 1997 de waştîbî ke domana xo nufus de jê (sey) “Dêrsime” qeyd bikero. O taw no waştiş hetê Komara Tirkîya ra nêameybî qebul kerdene. No sebeb ra nameyê “Dilane” ame panayene. Emser kî Xidir Ercanî waşt ke nameyê çênaya (kênaya) xo bivurno biçarno “Dêrsim”. Verê, Ercanî silayîya qereqolî girewte, uca (uza) de polîsî ey ra va ke o dawayê xo ra bitexilîyo.
Xidir Ercanî ajansê ANF de qisey kerd va ke “Ez nêzana çayê nameyê Dêrsimî qebul nêbeno. Xora ma çêyê (keyeyê) xo de bi nameyî Dêrsime venga çênaya (kênaya) xo danîme. Nameyê aye xora Dêrsim a.”
