Di qiteyî, di qederî: Nadîye Mirad û Denîs Mukwege sey pê nêasenê, la dewaya înan yew a. Seba mucadeleya înan a muştereke ewro her dîyan (hur dimêna) Xelata Nobelî ya Aştî girewte. Her di aktîvîstan dewaya xo duştê şidetê cinskî de ramenê.
Goreyê Heyetê Nobelî ra, her di aktîvîstanê heqanê merdiman “bi hewayêde bêemsal duştê sucanê cengî de lebate kerd. Her yewê bi tewşfîqê xo şidetê cinskî yê cengan ard verê çimanê dinya û nîya sucdarî kerdî bellî.” Emser heyetî besenêkerd favorîyo yewkek weçînê. Jurîya panc kesan a Norweçî mabênê 216 merdimî û 115 rêxistinan ra çînit we. Xelata Aştîye roja 10. kanûne, serrgêra mergê Alfred Nobelî de yena dayene û erja xo 9 mîlyon Kronanê Swêdî ya (dorê 860.000 Euro).
Denîs Mukwege û Nadîye Mirad kam ê?
Denîs Mukwege cinînas û pisporê tedawîkerdişê mexduranê tecawuzî û aktîvîstê ver bi şidetê cinskî yo. Ey Kongo de, mintiqayêda cengî de, seba cinîyan nêweşxane kerd ra û nîya bi des hezaran canî xelisnayî ra.
Nadîye Mirad kurda êzîdî ya 25 serrî ya ke hetê terorîstanê DAÎŞ ra remnîyabîye û hîrê amşî sey koleya cinskî rehîneya çeteyan bîbîye. Ewro Mirad Elçîya MY ya Nîyatpake û nuştox a. A seba heqanê mexduranê trafîkê însanan gureyena. Nîya a her cayê dinya de bîya vengê bi hezaran cinîkanê tecawuzbîyayeyan, yê qirbîyayîşê êzîdîyan û yê pêro mexduranê DAÎŞ. A ewro Almanya ciwîyena
Vilaweka xo de Nadîye Mirad va ke “Kulturanê Rojhelatê Mîyanênî de derheqê şidetê cinskî de qiseykerdiş zor o. La mi ra ver xeylê cinîkan vengê xo kerdbî berz. Nika vanê qey nafîle bo, kes goşdar nêkero. Ney. Ez vana ke pêro êzîdîyî vengê xo berz bikerê û qalê hedîseyanê xo bikerê ke dinya bibo şahîda nê suc û gunan.”
