Xeylê şaristanê Kurdîstan û welatanê dinya de kurdanê muslumanan roşanê Remezanî bimbarek kerd û hîna kenê. 30 rojî roje ra tepîya muslumanan na rey nimajê Remezanî bi xutbeyanê kurdkî kerd.
Qezaya Şirnexî Hezex de şodir ra xeylê kesan Parkê Aştî de nimajê roşanî kerd. Uca (uza) de Îmam Alî Nasî xutbeyê xo yê kurdkî de va ke “Nimajê ma yê nocayî (nazayî) duştê camî ya kî îmamî de nîyo. Eke ma şîme camî, gerek derheqê dînê ma de çîyê bêro musnayene. Çi heyf ke zalimî nêverdanê ke camîyanê xo de bi zonê (ziwanê) xo qisey bikerîme. Ma kî tîya (îta) teber ra xutbeyanê xo bi zonê (ziwanê) xo dewam kenîme.” Badê ke nimaj ame kerdene, şarî roşan pîya pîroz kerd.
Heto bîn ra Elkê de kurdan meydanê şarî de nimajê Remezanî kerd. Uca (uza) de Mele Emîn Îmamogluyî xutbeyanê xo yê kurdkî de naye ser o vindet: “Eke ju (yew) milet miletêde bîn ser o bi zor, zulm, asîmîlasyon û înkar ceng keno ra, cayê nê miletî îslam de çin o. Eke hemdînê xo zerar vîneno,, gerek ju (yew) musluman bêveng memano, duştê naye de bivejîyo.”
