Pêrodayîşan ra tepîya, şaristanê kurdî Mûsil kewt destê hêzanê îslamîstanê radîkalan. Bi hezaran kurdî remay.
Roja şesemîye Mûsil de mabênê hêzanê îslamîstan ê Dewleta Îslamî ya Îraq û Şamî (DÎÎŞ) de tewr tay 25 endamê DÎÎŞ amey kiştene. Melumatan ra gore artêşa Îraqî bêheze mende ke şaristan bipawo. Xeylê taxê şaristanî kewtî destê çekdaranê DÎÎŞ. Walîyê Mûsilî venga pêşmergeyan da ke îmdadê şaristanî rê biresê.
Hêrişê DÎÎŞ de bi desan kurdê şabakî û êzîdîyî amey qetl kerdene. Bi hezaran kurdan banê xo terk kerd remay bi Herêma Kurdîstanî. Enformasyonan ra gore mabênê 300.000 û 500.000 kurdî Mûsil terk kenê şonê Herêma Kurdîstanî. Partîyanê YNK û PDK kî ofîsê xo caverday. Goreyê vatena spîkerê Wezîrîya Karanê Zereyî yê Îraq General Saad Maanî ra, artêşa Îraqî 20 çekdarê DÎÎŞ kişt. Nê reqemî hetê Esmat Rajabî ra, serekê PDK ê ofîsê Mûsilî, amey tesdîq kerdene. Melumatanê artêş û asayîşî ra gore, pêrodayîşan de 47 leşkerê Îraqî û 27 endamê DÎÎŞ amey kiştene. Dirbetinan mîyan de kî 60 polîsî estê.
Pêşmergeyê Kurdîstanî sînorê Herêma Kurdîstanî de amey pêser û emr pawenê. Wezîrîya Pêşmergeyan eşkera kerd ke “Çi heyf ke Hukmatê Federalî hîna qerar nêda eke bikewe Mûsil yan ney. Coka hêzê pêşmergeyî teberê Herêma Kurdîstanî de besenêkenê ke mintiqa kontrol bikerê.” Jabar Yawarî, serekê wezîrîya pêşmergeyan, da zanayene ke “Eke pêşmergeyî uca bibîyêne, têde nê teqayîş û merdena hemwelatîyanê mesuman nêbîyêne.” Xeylê sîyasetmedarî wazenê ke pêşmergeyî Mûsil biseveknê.
Nê rojanê peyênan de DÎÎŞ herêmanê sunîyan de xeylê hêrişî kerdî. Wextkilm aye kî parçeyê şaristanê Samarra kontrol kerdîbî, o esna de DÎÎŞ profesor û wendekarî rehîn girewtîbî. Vilaweka xo de DÎÎŞ îddîa kena ke suîkastanê înan de aye herêma Dîyala de ofîsê PDK teqa û naye de 20 kesî kiştî.
Heto bîn ra PKK da zanayene ke gerîllayî amade yê ke dest bidê hêzanê Herêma Kurdîstanî û pêşmergeyan ra pîya kurdan DÎÎŞ ra biseveknê. Hetê YPG ra yew vilaweke ameye dayene ke “Mintiqayanê teberê Herêma Kurdîstanî de zaf şidet esto. PKK hazir a ke bi pêro hêzanê kurdan duştê cîhadîstanê DÎÎŞ de pêro bido.”
DÎÎŞ ke hîna heşt taxê Mûsilî kontrol kena, bi hezaran kurdî welatê xo terk kenê remenê.
Pesmergeye ma Musul pirnika înura ano, ewre Kîrkuk meste Musul, Nejdî dek Kurdîstan yeno ronayis. Rojhelatê Mîyan de se beno bibo, endî seba talîyê Kurdan gureyeno. Kemerê domînoyî hervî hervî gineno var, nika Rojhelat û Bakur este… Her bîjî Kurdistan! Biqedîyo endî koledarî! Heyat tirkuna, erebuna, mollayuna durrî pirr rindeko!!!