Wextêk ra ver Google verçimikê xo yê biaqilî Google Glass vetîbî, nika Microsoftî bi projeyê xo yê neweyî keweno reqabet: verçimikê bi nameyê HoloLens besekenê verê çimanê merdimî de holograman virazê û nîya ronê dinyaya rastikêne. Vîdeoyo corên de fonksîyonanê ke Microsoft plan keno, yenê dîyene.
Melumatan ra gore Microsoft hewt serrî nimitkî gureya ke HoloLens virazo. Menajerê şîrketê DYA Alex Kîpmanî yew kombîyayîşê çapemenî de no derheq de va: “Ma komputura holografîk a tewr averşîyaye ya dinya viraşte.” Zereyê HoloLensî de prosesor û çîpê grafîkî yo nîp-newe esto.
Verçimikî hîna test benê, yanî temam nîyê. Labelê goreyê melumatanê verênan merdim besekeno pê camê ci objeyanê dîjîtalanê cîya-cîyayan -seke rastikên uca r’ ê- derûdorê xo de rono, ha serrnameyo viraşte bo ke dês de aliqnaye yo ha applîkasyonê dîzaynî bo ke merdim masa ser o gureneno.
Naye ra teber tabî vejîyayîşê sîstemo newe yê Windows 10 rojeva kombîyayîşî de bî. Windows 10 reya verêne êlula parî amebî musnayene, nika hema-hema qedîya. Xeylê fonskîyonî vurîyayî, dîzayn kî nika goreyê waştişê zafê xebitnayoxan ame vurnayene:
- Menûyê destpêkî dîzaynêde newe girewto
- Yew merkezo newe yê peyaman ame viraştene
- Hetkara vengî Cortana nika komputeran ser o kî gureyena
- Applîkasyonê neweyî nika hemdem komputure, tablet û telefonê destan ser o gureyenê
- Webwendoxo newe yê Microsoft vejîno. Nameyê ci sey verî Internet Explorer nîyo, nika binê nameyê Project Spartan esto.
Çîyêde balkêş: seba yew serre seba zafêrîya muşterîyanê Windows 7 û 8, başêrkerdiş bi Windows 10 bêpere yo.
