Nuştoxê kirmancî Mehmûd Nêşiteyî vizêr şewe nêweşxaneyê Dîcle de çimê xo nayî pa dinya xo vurnaye. O ewro mîyanê keye, nas û dostan de Baxlar, Dîyarbekir, de ame wedardene.
Mehmud Nêşite 1945 de dewa Xosorî, qezaya Licê de ameyo dinya. 1963 de bî mamoste. Hîris serrî tayê şaristananê Tirkîya û Kurdîstanî de mamostayîye kerde. 1994 de bî teqawut. Serra 1980î de surgun bî, tepîya Dîyarbekir de ciwîya. Bi kirmanckî xeylê hîkaye û meqaleyî nuşt û endamê Grûba Xebate ya Vateyî bî. Keda Mehmûd Nêşiteyî seba raverberdişê kirmanckî bêemsale bîye.
Mehmûd Nêşite DêrsimInfo de kî 64 nuşteyî nuştî.
Heq rehma xo piro kero û sebr bido keyeyê mamostayî. Zere û xatirê qewmê ma.
DêrsimInfo ser o nuşteyê xo yê peyênî de Mehmûd Nêşiteyî nîya nuştbî:
“Şitê dayîkanê ma kurdan, xorînîya tarîxê miletê ma ra yeno! Tede tehmê welatê ma, tehmê kulturê ma, tehmê ziwanê ma esto. Şitê dayîkanê ma kurdan de rence esta, zehmetî esta! Şitê dayîkanê ma de amênê mewcûdîyetê miletê ma, amênê mewcûdîyetê însanetîya ma esto! Şitê dayîkanê ma de şan, şeref û namûsê miletê ma esto! Şitê dayîkanê ma de amênê ziwanê ma esto…”
