Merdim ke nêzdî ra qayîtê program û pratîkê CHP bikero, vîneno ke na partîye raştgira mîyanên a, yanî çepgire nîya. Na partîye 20 serrî yo ke nêceribnena yew vîzyonê çepgirî yo newe awan bikero, duştê ney de CHP 20 serrî yo ke ceribnena bi sîyaseto raştgir û populîst çareyan saye bikero. Labelê bi raştgirbîyayîş ra CHP heta nika besenêkerd ke bibo hukmat û bi nê sîyasetê xo kî raştgirê Tirkîya yê radîkalî kerdê hêzdar. No kî musneno ke bi lewîyayîşê CHPya bi kulvarê raşt, ê besenêkenê duştê raştgiranê Tirkîya de vejîyê. Çike CHP duştê nîjadperestîye de nevejîya, nê semedî ra kewte binê kontrolê înan – hem zereyê partîye de hem kî teberê partîye de. Halê CHP nîya r’ o. Kurdan ra raver ganî CHP hêzdarîya raştgiranê tirkan zar bikero. Seba naye kî awankerdena yew sîyasetê neweyî û polîtkaya raştgir û populîste ra dûrîbîyayîş de nêbîyayî ya. Heto bîn ra merdim mecbur vajo ke bi tayê elementanê raştgiran zereyî hende hêvî çin a ke CHP raya xo ya raştgira populîste bivurîyo.
Nîya hende ferqê CHP û partîyanê bînan ê sey AKP çin o. CHP pêro operasyonanê teberî de (sey nimûneyî, Efrîn) destek da AKP û zereeştena sîyasetmedaranê kurdan ser çimê xo ca da. CHP nê sîyasetê xo ra Tirkîya de nîjadperestîye kerde pêt. Bi na polîtîkaya kud û populîste hukmatbîyayîşê AKP û raştgirî bîyê kronîk. Şima ke pratîk de sîyasetê AKP ra vanê “heya”, o wext şaş mebê ke şar weçînitiş de şima keno xo vîr ra. Seba kurdan kî henî yo: pratîk de CHP sîyasetêdo raştgir ramena û tena 1-2 çekuyanê weşan henî bêveng goşanê kurdan ra. Weçînitiş ra di hewteyî verî keyberê kurdan cinena û rayan wazena. No taktîk hende biaqil nêbî, tena yew verzîyonê populîzmî bî. Çike pratîk de CHP heta nika mesela kurdan ra dûrî vineta, xo duştê heqanê kurdan de ca kerd, di hewteyê verê weçînitişî taktîkê cinitişê keyberê kurdan kî xeletîya xorîn a. Bi nê sîyasetî, CHP besenêkena bêro hukmat ser.
CHP kurdan ser tena rindek qesey kena, labelê programê CHP de hîna perwerdeyê kurdkî ser yew çekuye çin a. Bi nê halî xeyrê CHP kurdan rê çin o. Înan ke besekerd sîyasetê xo yê newekar û raştgiro radîkal peyser bidê, no kurdan rê bes o.
Paradokso bîn kî taktîkê “tirkîyayijbîyena” kurdan a. Tirkan ra pîya yew partîye awankerdiş yew het ra verê hêzdarbîyena demokratanê tirkan gêno û heto bîn ra kî raştgiranê tirkan keno hêzdar. Merdimî ke qayîtê 20 serranê peyênan kerd, ney asan vîneno. Nê semedî ra ganî kurdan sey katalan ya kî baskan partîyanê xo yê neteweyîyan ronê. Labelê partîyê kurdan tena şaristananê kurdan de ney, pêro şaristananê Tirkîya ke tede kurdî ciwîyenê, organîze bibê. Hemkarî ya kî koalîsyonê partîyanê kurdan û tirkan kî weçînitiş ra ver ney, la dima bêrê rojeve ser. Weçînitiş ra dime merdim besekeno derheqê viraştena koalîsyon ya kî hemkarîye de ya kî derheqê wad û heqanê kurdan de înan de qesey bikero. Nêke heta nika her weçînitiş ra dime wad û prensîbî ameyî xovîrrakerdene û her kes raya xo ra şî. Bi na stratejî partîyê demokratîk ya kî çepgirî ya kî lîberalê Tirkîya û kurdî besekenê duştê raştgir û nîjadperestan devejîyê.
Wexto derg de kilîtê serkewtişî nê di faktoran de nimite yo:
– Sîyasetê CHP yo raştgir û populîst raştgiranê tirkan ê radîkalan keno pêt
– Yew partîye de rêxistinbîyena kurdan û tirkan kî raştgiranê tirkan ê radîkalan kena pêt
Bi sîyaseto xelet û populîst merdim besenêkeno verê dîktatorîye û dîktatoran bigîro!
