Protestoyê Sûrîye ke 15. adare ra bi nat dewam benê, nika kî kurdê Sûrîye kotê ci. Şarstanê Qamişlo, Hasekî û Amûde de bi seyan kurdî rayan ser o bîy.
Nimajê îne ra tepîya bi seyan kurdî Qamişlo û Amûde de bi slogananê jê (sey) “Tena hemwelatîye ney, ma azadîye wazenîme” vejîyay rayan û dewleta Sûrîye protesto kerd. Şaristanê Hasekî de kî dorê 200 kesan protestoyo nîyanên kerd, labelê ê hetê hêzanê dewlete ra amey vila kerdene. Esnaya protestoyan de na reya verên a ke kurdî kî tewirêde organîzebîayeye de beşdarê mîtîngan benê.
Pêro Sûrîye de protestokerdoxî hetê hêzanê dewlete ra zulm vînenê. Organîzasyonanê heqanê merdiman (mordeman) ra gore polîsî heta nika xeylê protestokerdoxî kiştî. Rejîmê Beşar al-Esadî ke serra 1963 ra bi nat bi desto çîp hukmat rameno, hîna nêwazeno ke dîktatorîya xo caverdo. Roja çarşemîye de Esadî qiseykerdişê xo de vaad kerdo ke reformî bêrê kerdene, labelê muxalefet ra gore Esad sirf pê serewedaritoxan xapneno. Hîna rewşa welatî pête nîya.
Bitaybetî, Esad ceribneno ke kurdî bîyaro xo het. Teqrîben di mîlyonî kurdan ra 300.000 teneyî nêm seserre ra bi nat Sûrîye de bê nasname yê. Coka zaf heq û îmkanê înan çin ê. Wexto ke protestoyî kî Kurdîstanê Rojawanî de bîyê zêde, wezîrîya kar û ardimê sosyalî yê Şamî va ke do tayê reformî bêrê. Heta nika kurdê Sûrîye ke bê nasname bîy, nêşikîya dikan ronê, bibê memur, doktor, dadger, avûkat, malim ûsn.
Ez zof saben ke suriyadek Sare ma meyadanudere. Kurde tirkiya hona hewne xoridere.