Roja 08.07.2010 de hîrê sey kurdanê Îsraîlî şaristanê Tel Avîvî de verê dayîreyê sersefirîya Tirkîya amey pêser û dewleta Tirkîya protesto kerd. Xeylê cêncî pêserameyîş de di saetî pankart û parolayî sey (jê) “Terorîst Tirkîya ozrê xo biwaze”, “Tirkîya de qirkerdişê kurdan rê êndî bes o”, “Kurdîstan welatê ma yo” hewa nay.
Xeylê alayê Kurdîstanî destan de bîy, tayê qiseykerdoxan qeseyanê xo de va ke, “Êndî dinya na bêvengîya xo vera qirkerdişê şarê kurdan bibirno. Şarê kurdan hezar serran ra zêde Mezopotamya de ciwînê û nika koleyîya Tirkîya, Surîye ya kî Îran nêkenê.” Qeseyan de bî eşkera ke gerek ke Îsraîl û şarê kurdan bêrê têlewe û dewleta Îsraîl meseleya kurdan ser o baldar be.
Deyrîbaza kurde Hadassa Yeşurun qeseyê xoyê kilmî de va, “Dewleta tirke Kurdîstan de teror keno, kurdan kena vêşan, la şarê bînî rê ardim kena.”
Kurdanê Îsraîlî ra Yehudot Kurdistan (יהדות כורדיסתאן), yanî “yahudîyê Kurdîstanî” vajîno. Îsraîl de 160.000 ra zêde kurdî estê. Nînan ra zaf namdar kî yahudî Yîtzhak Mordechaî yo. Mordechaî generalo kan ê ordîya Îsraîlî yo.
