“Kurd û zaza” ser o roşnvîranê kurdan ra protesto

Roşnvîranê kurdan cîya namekerdişê “kurd û zazayan” (bi tirkî “Kürt ve Zaza”) protesto kerd û da zanayene ke vatişê naye xelet o. Rasta ci gerek ke bibo “kurdê zaza û kurmancî”.

Roşan Lezgîn, Şukru Urgun, Huseyin Turhalli, Paşa Uzun, Haydar Işik, Zeynel Abîdîn Han û rosnvîranê bînan ard zon (ziwan) ke komara Tirkîya ronayîşê xo ra bi nat şarê kurdan înkar kerdo. Zon (ziwan) û kulturê kurdan kerdî qedexe. Her metod ra waşt ke kurdan bikero tirk.

Vilaweka xo de roşnvîrî danê zanayene ke sîyasetkarê tirkan wazenê kurdan parçe bikerê. Mîsal, Erdogan qiseykerdişê xo yê Muşî de vano ke “Ma Malazgêrd de bi tirk, kurd, ereb û zazayan bîyîme şehid…”. Erdogan ke şêro kotî, no qeseyê xo tekrar keno. Gerek ke însan bizano ke kurd nameyêde serekî yo. Zaza (kird, kirmanc, dimilî), kurmanc (kirdas, behdinî), soran (mukrî), goran (hewraman) û lur (kelhur, lek, feylî, bahtiyarî) parçeyê nê nasnameyî yê.

Xora kirmancan ra şenik kesî xo ra vanê “zaza”. Zafêrîya kirmancan xo ra vanê kird, dimilî ya kî kirmanc û zonê (ziwanê) xo ra kî kirdkî, kirmanckî ya kî dimilkî. Pêro grûbê kurdan zonê (ziwanê) xo jê (sey) kurdkî name kenê û xo ra kî vanê kurd. Sermîyanîya dewleta tirke kî na rastîye zaf rind zanena. Labelê sebebê sîyasetê înkarkerdiş û asîmîlekerdişî ra propagandaya dewlete dewam bena.

Roşnvîrê kurdî sermîyanîya dewleta tirke naye ra protesto kenê.