Kulê kirmanckî kulêde xedar, kulêde bêkes û kulêde bêderman o.
Raşt a kî ge-gane ziwanê ma kirmanckî rê zereyê mi bêhemd, hem kî zaf bêhemd, veşeno. Hetanî ke no kulê ziwanê ma weş nêbî, kul û birînê mi kî nîya dejenê û jan danê. Ewro ziwanê ma kirmanckî hetê nusnayene ra rind-xirab raye gureta û şono. La hona ma xo mîyan de yew nameyê lehçeya standarde ser o nêgurîme. Hona ma yew ziwanê standardî ser o nêvindeme. Her kes ke goreyê keyfê xo yan kî goreyê nameyê lehça mintiqaya xo na lehça name kero, delîl halê ziwanê ma rê.
No derheq de ganî şarê ma yew noqta de êndî pêreso.
Bi nameyê yew lehçaya standarde êndî bixebetîyo.
Yew alfabe û ziwanê de standard ser o êndî bêrone vindetene.
Xeylê waxt o ke Grûba Xebate ya Vateyî ziwanêde standard ser o gureyena. Ganî merdim kî na keda û na xebate ra îstîfade bikerone.
Her çiqas ke ewro nameyê çar lehçan ra yanî kirmanckî, zazakî, kirdkî û dimilkî ke yeno qeseykerdene kî ganî yew lehçaya standarde bêrone guretene.
Ge hênî, ge nîya, nêbeno.
Na mesela ganî êndî şarê ma mîyan de rind zelale bo!
Ê dideyin, na kampanya boykotî ya ke TZP-Kurdî dest bi ci kerdîbî û nê sloganê ke pankartan ra bi ziwanê ma ameybî nusnayene, çi heyf ke zêderîyê xo şaş ameyîbî nusnayene.
No kî dej dano merdimî û zerar kî dano ziwan.
Nê sloganê ke pankartan ra ameybî nusnayene, tayê xo nîya bîy: “Ma perwerdeya zûnî wazenî zûnî ma, hînî beso ma kurdî qisê keno”
Yanî no ziwanê ma honde kî bêqedr û bêqîymet o.
Honde kî bêkes û bêwayîr o.
Pankartan ra di çekuyan nusnenê, înan kî şaş nusnenê.
Yanî henî bîyo ke her kes goreyê keyfê xo raşt beno, şaş beno şîrpîne ci ra ano û dano piro nusneno. Na şîrpîne cira ardene kî zerar dana ziwanê ma. Heya, merdim xeta keno la honde kî ney. Ma hetê ra keme şên, hete ra kî keme xirabe. Mi ra henî aseno ke ziwanê ma ser o kay yenê kaykerdene. Ganî muhîmîya ziwanî ser o mêro vindetene.
Kulê ziwanî derdêde henî bêderman nîyo. Dermanê kul û birînanê ziwanê ma, ma dest der o.
Bêçare mendene kî qedere nîya.
Ma hetanî nika bêçare mendene xo rê qeder zanite. La ewro qederê ziwanê ma, ma dest der o.
Dem demê wayîrvecîyayîşî yo.
Dem demê kamîya xo rê, rûmeta xo rê, roştîya xo rê, tarîxê xo rê, welatê xo rê, dawa xo rê, têkoşîna xo rê, ziwan û kulturê xo re wayîrvecîyayîş o. Dem demê wayîrvecîyayîşê na roj o.
Ma ke na roje rê wayîr mevecîme, êndî qet rojanê bînan rê wayîr nêvecîme.
Ma ke ewro ziwan û kulturê xo rê wayîr mevecîme, gelo çi taw wayîr vecîme?
Ma ke ewro ziwan û kulturê xo rê wayîr mevecîme, gelo kam wayîr vecîno?
No sebeb ra kî dem demê wayîrvecîyayîşî yo. Dem demê piştîdayena piştî yo. Dem demê vengberzkerdişî yo. Dem demê xoverdayîşî yo.
Dem demê kul û birînanê ziwanê kirmanckî têrapîştiş û dermankerdişî yo.
Dem demê rindekîya ziwan û kulturê xo de weşîye de mendene yo.
Wusênê Gestemerde
bira wusene jü sarke ce xo de zone xu qesenekerdse o sar tene newesiyedero. Sare ma zaf xu kerdo newes u domanuk biye newes zon u kulture ma biyo newes.Ce ma piye ma mi ebe tirki qesekene ez bonc serurawo von zone xu de qese bike i wena illa ebe zone tirki qese kene. dewleta tirk sare ma asimile kerdo. nika zaf zoro ebe kirmancike cede u domane xu de ebe zone kirmancike qesebike. ez am ebe zone ma qesekon piye mi neskuno zaf zordende qese keno. nu hal rind niyo ci benoso zone mara beno.
Bi wendegehi zazaki, bi perwerdiya bi ziwane ma, standardardiya zazaki zoro. Jü hetra mordem gerekeke seba guretise heqa kirmancki / zazaki biguriyo, hete binrak na zon / ziwan niya bero qeseykerdis, nusnekerdis.
Mira gore tewr probleme girs standardizasyone lehceyi niyo. Probleme tewr muhim, kese ki na zoni zone, qesey nikene. Qeseye jü Bask esto “Jü ziwan eke mordemeke na ziwan zone qesey nikerd qedino”. Gama virenede sare mayeke nu ziwan zono, qesey kero. Tepiya heqa perwerdiye gerekeke biyero guretene.