Komela Armenîyanê Dêrsimî karê xo dewam kena

Xebera rojnameya tirke “Sabah”î ra gore Komela Armenîyanê Dêrsimî (KAD) ke no wisar ame saz kerdene, karê xo bi serfirazîye dewam keno. KAD heta nika 600 famîlyayê armenîyanê Dêrsimî tespît kerd.

Wezîfeyê komela îrtîbatkotişê armenîyanê Dêrsimî yo ke heta nika ne kultur ne kî nasnameyê xo azad ciwîyayê. Naye serra 1910 ra dime gamêda verên a ke komelêda armenîyan karo nîyanên rameno. Armanco verên ê KAD o yo ke 600 famîlyayanê armenîyan rê bireşo, înan îtîqadê armenîyan ra gore waftiz bikero û bi kursan zon (ziwan), îtîqad û kulturê armenîyanê Dêrsimî ancîya (onca) geş bikero. Heto bîn ra kî KAD ceribnena ke cayanê tarîxîyan jê (sey) mezele, dêr (kîlîse), ocaxê zerrnî ûsn. bi fonêda armenîye restore bikero.

Fikrê ronayîşê Komela Armenîyan raver ra hetê Selahattîn Gultekînî ra pêşnîyaz bîbî. Gultekîn Dêrsim ra yo û heşt aşmeyî raver pê qerarê dadgehî nameyê xoyo tirkî û dînê xo daybî vurnayene. Nasnameyê ey de nika nameyê Mîran Pîrgîcî û dînê xiristîyanîye nusîno. Pêra Pîrgîcî pê no qerar qet memnun nêbîyê, înan ra gore ey ê kerdê eşkera. Labelê Mîran Pîrgîc raya xo ra dewam kerd û ser o kî Komela Armenîyanê Dêrsimî naye ro. Pîrgîcî reyê vatîbî, “Ez nêwazena ke armenîyanê Dêrsimî ra nameyê kurd ya kî tirkî bêrê pira nayene.” Pîrgîc peynîya lebatêda derge d bi şeş hevalanê xoyê dêrsimijan na komele naye ro.

Mîran Pîrgîc rew ra rojnameger bî, nika 50 serre yo. Nika Pîrgîc bi laj, xal û birazayê xo ra pîya bîy waftiz. Pîrgîc naye ser o henî vano: “Peynîya 50 serrî ciwîyayîşo binê bawerîya xeribe de axir îtîqadê xo rê wayîr vejîna, aye ra zaf bena zerrîweş.”