Badê ke Şaristanê Kurdîstanê Rojawanî Kobanê hetê hêzanê YPG û pêşmergeyan ra destê terorîstanê çeteyanê “Dewleta Îslamî” ra amebî raxelisnayene, heyat hêdî-hêdî beno normal.
Goreyê xebera Rûdawî ra, sazgehê amerîkanî bi nameyê “Myscol” nika soz da ke seba çareserkerdişê meseleya elektrîke çend jeneratoran bido şaristanî. Pê nê jeneratoran do mumkîn bo ke çemê Firatî ra awe bikirişnîyo zereyê şaristanî.
No taw Kobanê û dewanê derûdorî de 100.000 kesî ciwîyenê. Şaristano ke hîna xan-xirabe yo, tede problemî zaf ê. Bitaybetî mazot kêmî yo. Mazoto ke mendo zî, zaf baha yo. Werd sînorê Tirkîya ser ra yeno Kobanê, hîna firinî çin ê.
Berpirsîyarê weşîye yê Kobanê Dr. Hîkmet Ehmadî ra gore nika Kobanê de di nêweşxaneyê neweyî yenê viraştene. Verê cû, bi nameyê Emelî Kobanê de yew nêweşxane amebî viraştene. Na fay yew nêweşxaneyo sîvîl û yewo eskerî yeno viraştene. Nêweşxaneyo sîvîl bi hetkarîya Rêxistina Doktoranê Bêsînoran yeno viraştene û ganî rojanê verê ma de biqedîyo. O nêweşxane de nêweşî bêpere tedawî benê.
Nêweşxaneyo eskerî de kî do 7 doktor û 26 hemşîrayî bigureyê. O nêweşxane kî nêzdî de beno temam, labelê hîna darû û dermanî kêmî yê. Wasitaya weşkerdişî, sey rontgen, kî çin ê. Coka mecburî xeylê nêweşî yenê rusnayene nêweşxaneyanê Tirkîya. Pêro pîya Kobanê de 27 doktor û 50 hemşîrayî estê.
