Xeylê armenîyanê Dêrsimî peynîya qirkerdişê 1915 de welatê xo terk kerd. Tayê şîy Lubnan, tayê şîy Armenîstanê Rojhelatî ya Fransa û tayê tenêna dûrî şîy Amerîka. Verê ra bi (ebe) propagandaya dewleta Tirkîya xeylê dêrsimijan îman kerdêne ke ê tirk ê. Serrî vêrdî ra û ters tenê bî vîndî, qewetê zure bî kêmî û rastîye bîye eşkera. Gama dîyine de şarê ma ziwan (zon) û nasnameyê xo ferq kerd. Nika kî vejîno meydan ke Dêrsim de xeylê armenîyî bîyê û hezarî serre hardê (erdê) ma de ma pîya weşîya xo ramita.
Kilamê armenîyanê Dêrsimî kî armenîyan pîya bar kerdê û Dêrsim de amey xovîrrakerdene. Wa teyna armenîyî ney, hebike mend ke kirmancê Dêrsimî ziwan, îtîqate û kilamanê xo xo vîr ra bikerê. Sey (jê) gama verêne Mikaîl Aslanî gurayîşêde zaf muhîm ardo meydan û çar serran ra tepîya sey kilamê armenîyanê Dêrsimî ardê pêser. Nînan ra des teneyî çinitî we û albuma xoya “Petag”î de weşanay. Bi hemkarîya deyîrbazanê armenîyan Tîgran Hekopyan û Lîlît Sîmonyan ra eserêde rinda rind da viraştene.
Mikaîl Aslan no derheq de vano, “Domanênîya mi de tayê nameyê dewan xo bi xo reyna vatêne. Norsîn, Hopik, Axwesî, Sorpîyan. Ziwanê ma de manaya xo çin bîye. Tepîya maya xo ra pers kerdêne, aye mi ra va ke, ‘Lajê mi, nê armenîyan ra mendî’ û ney ra qederî nêwaştêne ke çîyêna vajo.”
Albuma “Petag” de 12 kilamî estê. Merdim (mordem) şîkîno na albume de vengê armenîyanê Dêrsimî ser bi keyfweşîye goş bido. Albume rastîya Dêrsimî ser o çilaya muhîm a, eserêde bîn ê kulturê ma yo. Kulturê armenîyan û kulturê kimancan yew o, çike vîyarteyê înan yew o. Şaro ke vîyarteyê xo nas nêkerd, besenêkeno ke raver şêro.
