Hunermendê Tirkîya Îbrahîm Tatlises albume û karanê xoyê bînan ra tepîya nika kî Kurdîstanê Başûrî de banan (bonû) virazeno û roşeno. Banê ke uca (uza) dano viraştene, aşmêna do biqedênê. Seba ke (seweta ke) rotişê nê apartmanan rind nêşono, Tatlises bi (ebe) xo ame verê kamera û projeyê xo yê banan dano naskerdene.
Kurdîstanê Başûrî de apartmananê xo ra nameyê “Baxçeyê Cenetî” na pa. No proje karsazo kurd Ruştî Saîdî ra pîya viraşt. No projeyê banan de para Tatlisesî 50% a. Naye ra gore Tatlises Kifrî, Hewler û Silêmanîye de 70 hezar banan dano viraştene, erjaya nê projeyî pêro pîya 1 mîlyar Dollarî ya.
Seba no proje Tatlises kot (kewt) verê kamera û bi kurdkî no proje da naskerdene. Reklam de yeno vatene ke wextê vîllayan êndî qedîyo, nika wextê apartmananê modernan o. Kilama nê reklamî “Şemmame” ya, na kilame nê şaristanan de zaf qayilê miletî şona.
