Hesê Geme de Roportajo Taybet: “Mi Teklîfê Hollywoodî Red Kerd!”

Ma fîlmê ey ra tepîya reya verêne Hesê Gemeyî reyde ameyîme têlewe û ma eyî saneyîme tayê persî ra. Fîlmo kilm “Hesê Geme Rîo De”, xeylê wext o rojeva medyaya komelkî der o. Ma behsê nê fîlmî, reqabetê Hollywoodî û xetayanê sîyasetî kerd.

DersimInfo: Şima bi xêr ameyî, birêz Geme. Seba wendoxanê ma, şima eşkenê reyna xo bidê naskerdene?
Hesê Geme: Ez xo nêdana naskerdene, çike her kes mi naskeno. Ez tena naye vaja: Ez Dêrsim ra ya, semt a, pêt a, derg a.

DersimInfo: Temam, Birêz Geme. Ma wazenîme ke şima reyde tenê serê fîlmî vinderîme. Reaksîyon û rexneyî senîn bîyî?
Hesê Geme: Rind bîyî, şarî temaşe kerd, zaf qayîl bîyî. Vera sansurê YouTube de şar nê fîlmî rê wayîr vejîya…

DersimInfo: YouTube çira sansur kerd ke?
Hesê Geme: Ez nêzana kamcî dewlete ya zî dewletî peyê nê serebûtî der ê, la ma înan rind texmîn kenîme.

DersimInfo: Baş o, şima vera YouTube de dewa nêkerde?
Hesê Geme: Hende wextê ma çîn bî. Xora kanala şima ya YouTube zî qic a, hende ca çîn o ke şar sixlet bêro temaşe bikero. No zî şima rê rexneyê mi yo. Hende serrî yê ke şima xizmeta ziwanê ma kenê, la hîna şima nêeşkayî yew kanala girse awan bikerê…

DersimInfo: Raşt o, rexneyê şima ca de yo. La dest û bara ma ra hende ame.
Hesê Geme: Çimê şima zî rind nêvînenê, ez se bikerî? Şima şîyî şîyî yew çeneke/camêrd dî û ard. Yanî rind ke mi nê fîlmî de kay kerd, aktorê bînî ke bibîyêne, heta roja ewroyêne înan na taybetîye hîna fehm nêkerdêne. Tîya de ganî ez xo bidî goynayene. No tecrube yo!

DersimInfo: Xora sahneya tewr rinde, remayîşê şima yo ke otel ra bîyo. Çimê xeylê aktor û rejîsoran a sahne de mendî. Vanê zaf raştkên û otantîk bîyo…
Hesê Geme: Otantîk motantîk bira! Mi fîlm-mîlm kerd xo vîrî ra, mi asansor ra xo eşt teber, ez 10 kîlometreyî remaya! Ma zî yewbînan ewro vînenîme.

DersimInfo: Eya, ma xeylê rey ceribna ke şima reyde qesey bikerîme, la telefonê şima cadaye bî.
Hesê Geme: Ma senîn qesey bikerîme? Şima ke wina bêprofesyonel ê. Yanî şima hîna nêeşkenê yew artîsta cinîye weçîne. Şonê şonê yew artîsto camêrd anê. Nameyê ci se bî? Camêrd-cinîye, makî-nêrî… Beno ke seba perey şima nîya kerd, la seba şan û nasnameyê mi, na yewe bêrêzîye bîye. Rind ke ez rew bîya hesar… ma awa Mizurî şimita bawo!

DersimInfo: Qusirê ma ra meewnê. Raşt o, çimê edîtorê ma yê kastingî rind nêvînenê, xora hîna genc o.
Hesê Geme: Amerîkayijî wina nîyê, profesyonel ê. Kam o ke karê xo, gureyê xo rind nêkeno, meqamê xo ra yeno dûrî kerdene. Kurdan mîyan de 30-40 serrî yew meqam de manenê, nêyenê cêr. Xo rê zî vanê “ma demokrat îme.” Şerê Hollywood ra bimusê tenê! Şima timaqkarîye û çimtengîye kerde. Sahneya barî de şima nêverda ke ez wîskîyêko rind qult bikerî. Şima kişta kamera ra vatêne: “Hese hêdî bişime, Hese giran bişime, Hese no zaf vay o, Hese hesabê çeneke mede!” Yanî mi nêeşkayî fîlm de konsantre bibî. Ez şima reyde reyna fîlm nêancena.

DersimInfo: Çekuyê şima raşt ê, Birêz Hese. La şima zî xeylê şimit! Heqa şima est a, la şima zî zanenê Rîo de Janeiro zaf vay o. Nê semedî ra ma waşt ke fîlmî Ewropa de biancîme, la şima vatbî “Rîo otantîk beno.”
Hesê Geme: Şima hîna çepgirîye ra nêxelisîyayê! O kameramanê şima vatbî “wîskî meşime, awe bişime.” Şenik mendbî ke ez fîlm caverdî. Yanî Rîo de, barê plajî de nişeno ro û yew geje de awe bişimî. Na paradîgmaya bêmodern, nêweş û kan, her rey vejîna serê raya ma. No nêverdeno ke ma bibîme wayîrê yew dewlete û ez zî Hollywoodî de bigurîyî.

DersimInfo: Hollywood? Çi têkilîya ci est a?
Hesê Geme: Eya, şima ra ver serekê Hollywoodî mi rê telefon kerdibî. La mi teklîfê înan qebul nêkerd. Mi vat “Ez vera modernîteya kapîtalîst de ya!” Merikî o wext telefon racîya. Dime ra ez peşman bîya, la êdî herey bî. Nê çekuyî çepgiranê ma kerdî fekê mi. O wext ra nat ez înan reyde qesey nêkena, rojnameyê înan nêwanena. Xo ra ê semedê na “modernîteya kapîtalîst” ra heq nêwazenê, otonomî nêwazenê, xoserîye nêwazenê. Fikrê dewlete ra 100 kîlometre dûrî ra remanê… Tena di çekuyî fekê înan der ê: modernîteya kapîtalîst û paradîgma… hîrê çekuyî!

DersimInfo: Ma çepgir nîme Hese, rehet be… Baş o, festîvalan ra, mîhrîcanan ra yew xebere est a? Tayê xelatî est ê?
Hesê Geme: Ma no fîlm seba ziwan û şarê xo viraşt. Çimê ma şan, xelat û şohret de nîyo. Xora mi Rîo de telefonê xo qapa kerd, festîvalî nêeşkayêne ke bi mi biresê. Komîteya Oscar û Nobelî ke mi gêrayêne, ez Rîo de bîya, telefon zî cadaye bî. Yewêna zî Festîvalê Cannes est o, la mi ra gore nîy o. Yanî Rîo de fîlm ancena, şona Cannes? Beno? Nêbeno. Rîo kotî yo, Cannes kotî yo!

DersimInfo: Ma wazenîme ke şima reyde yew fîlmo newe bivirazîme…
Hesê Geme: (Wurzeno ra) Ez şima ra zaf hes kena, la mi sond werdo ke ez şima de reyna fîlm nêvirazena. Xora wextê mi kî çîn o.