Her çî zelal o, mexapîyê!

Sîyaset ke nêbîyêne, bawer bikerê ke mi şima ra qalê zaf çîyanê tewiran, renginan kerdêne. Dinya hîra wa. Nuştoxo namdar Gabrîel Garcîa Marquezî zî wefat kerd. Mi waşt ke derg û dila qalê ey bikerî. O edebîyat bî, roman bî, dewlemendîye û renginîya xorîtîye bîye. La goreyê ma avantajê ey qat bi qat estbî ke zonê ey serbest, serdest û raver bî.

Ey rê oxir bo, ruhê xo şad bo.

Ma bêrîme rastîya ma ya serdin û derdine. Ez xo rê koyan ra vajî:

Hey ko! Ma qey vecîyayîme sêneyê to? Ma qey merdîme, vêşan-têşan mendîme? Ma qey kewtîme adiran? Ma qey veşayîme, rişîyayîme, sîndor û mayînan de, şewan û xiraban de, çalan û çengelan de, şilîyan û şepilan de, tarîyan û pukelekan de vîyartîme?

Dinya aleme zî zanena ke ma seba serbestîya welatê xo, seba heqê dewletbîyena miletê xo nê cefeyan antîme. Eke no sebeb nêbîyêne, ma qey nê cefayan biantêne ke? Eke no sebeb nêbîyêne, kamî vecîyêne ko, kamî kewtêne adiran, kamî bîyêne gerîla? Eke no sebeb nêbîyêne, kamî sareyê xo dajnêne, kamî bêçika xo lewnêne?

Qet kesî! Ma nika?

Nika sebebê nê cefayî xerepnê, hedefê na waştene xirab kerdê. Nika vanê “mileto demokratîk, ju welat, ju beyraqe” û giran bi giran yenê HDP. Nika vanê, “Ma aştîye wazenîme, pîyatîye wazenîme”. Ti zen kena ke ma “biratîye-aştîye” nêwazenîme. Ma nê vateyî ra xerîb nîyîme. Neway serrî yo ke dewleta tirke ma, ebe nê vateyî qaşo xapneno. Ti ke heq û huqûqê xo mewazê, xora ti ebe dewleta tirke bira wa. Na biratîye û aştîye bîya qederê ma yê xirabî. Nika giran bi giran, game bi game bi fekê tayê sîyasetmedaranê kurdan ra’wazenê bi nameyê na “biratîye û aştîye” (!) ma bikerê entegreyê sîstemê dewleta tirke.

Çîyo ke îta de zelal nîyo, çik o? Çiyo ke kam nêzaneno, çik o?

DTP beno HDP. Sebeb? Sebeb ne biratî ya ne zî aştî ya, planê entegrasyonî yo. Sirri Sureya Onder Efendî xora eşkera vano ke “Ma verba neteweperwerîya kurdan HDP na ro”. Şima nêwend? Ez zî Sirrî Efendî ra naye vajî: To çi wext dewleta Kudîstanî waşt ke? To çi wext bîya neteweperwerêde kurd ke? Sirrî Sakikî Efendî zî ma rê ÎT û MÎTê tirkan pesêneno…

Nê vate û planî pêro verba heqê dewletbîyena kurdan ê. Rojê nêameyêne aqilê mi ke juyo kurdo qaşo welatperwer ma rê MÎTê tirkan bipesêno.

Şima ke heqê dewletbîyena miletê kurdî nêwazenê, şima ke beyraqa kurdan nêwazenê, şima ke sîndorê dewleta Tirkîya ke bîyo sebebê parçekerdena Kurdistanî, qebul kenê, ma qey piştî bidîme şima? Ez qey piştî bidî şima? Gonîya şarê ma seba entegrasyonî rişîya? Gerîlayî seba entegrasyonî vecîyê koyan? Heyf û gune nîyo? No hondayê emeg, no hondayê cefa, hondayê fekdarîye seba entegrasyonî bîy?

Kes bi aqilê mi nêşikîno kay bikero. Kam ke aqilê xo dano kay kerdene, keyfê înan o.Çîyê ke ez wanena, vînena, heşnena, şima zî her kesî zî vînenê, wanenê, heşnenê. Ya nê planê entegrasyonî şima qebul kenê ya zî verba ci vecînê. Raya hîrêyine çin a. Ya bi sîstemê tirkî “tirkîyaperwerîye”, ya zî Kurdîstan. Êyê ke planê entegrasyonî der ê, helbet hîna şarê ma xapnenê, naye zelal nêvanê. Ê  nêşikîne vajê “ma entegrasyon wazenîme”. La ma hertim serbestîya Kurdîstanî waşte û wazenîme. Gelo qey entegrasyonperwerî eşkera naye nêvanê? Çike wazenê nê planî bêveng, giran bi giran biramê. Sîyaset de kay nîya yo. No kayo ke îmkanê şarê ma ser o ebe Ertugrul Kurkçîyan kenê heder, eke tam kerdî heder, ma rê kenê qeder! HDP seba entegrasyonî gama peyên a.

Şima kamî xapnenê?

Derdê ma Tirkîya rê demokrasîye arden a? To xo raxelesna, na raya Tirkîya menda, ha? Her çî zelal o, êndî her kes bi wîjdanê xo. La çi heyf ke îmkanê şarê ma ser o nê planê xo kenê. No kay, heta ke entegrasyon mebo, nêqedîno. Mekewê nê kayî. Na dinya de miletê ma rê qey heqê dewletbîyene heyf bo? Kamcî miletî ra heyf o ke ma rê heyf bo? Ma qasê tirkê Qibrisî, Andorayî, Kosovayî zî nîyîme? Kamcî milet heqê dewletbîyena xo nêwaşto ke ma mewazîme? Dewleta to ke çin bo, ti ke heqê dewletbîyene nêwazena, ma çi wazena? Demokrasîye? Serbestîye wazena? Dewleta to ke mebo, demokrasîya to, serbestîya to se bibo? Demokrasye û serbestîya ke bê dewlete na dinya de esta? Ney. Ma no çi fîlm o ti kena?

Ti seba miletê ma tenya dewletbîyene nêwazena! Ti seba tirkan naye nêvana! Wa dewleta dinya aleme bibo, yê ma mebo, ha!

Nimûneyê Kurdçstanê Başûrî zê dar keweno çimanê entegrasyonperweran. A beyraqe, a dewlete, o hukmat zê çengel keweno çimanê entegrasyonperweran. Entegrasyonperwerî coka hukmatê Kurdîstanê Başûrî ra, seba ke planê înan ra nimûneyêde xirab o, hes nêkenê. La naye zî zelal nêvanê, maneyan vînenê. Qaşo bi nameyê rexneyî wazenê ke na dewleta kurdan ra şarê Kurdîstanî dûrî bikerê. O ca şimşêrê verba entegrasyonan o. Ti verê serbestîya Kurdîstanî, heqê dewletbîyena Kurdîstanî biwaze, dime ra şikîna hukmatê Kurdîstanê Başûrî rexne bike.

A beyraqa Kurdîstanî ra qey keyfê to nêno? A dewleta Kurdîstanî ra qey keyfê to nêno? O parlamentoyê Kurdîstanî ra qey keyfê to nêno? Ma çi ra keyfê to yeno? Ebe dewleta tirke kurdan entegre kerdene ra keyfê to yeno, ha!

“Her çî zelal o!” ez vana. Pêro welatperweranê Kurdîstanî ra vana: mexapîyê!

(Resim: William J. Gauthier)