Gamêna raver

Wendoxa delale, wendoxo delal,

keyepelê ma xo ancîya (onca) vurna, kerd tenêna rind, xo berd tenêna raver, bî tenêna pêt. Her vurîyayîş de rindêrkerdiş esto. No kî fikrê ma bî. Ma waşt ke hedef û karê xo -pêşkêşkerdişê xeber û nuşteyanê kirmanckî şarê xo rê- bikerîme tenêna efektîf. Hem seba ma ke nuştiş û xeberviraştiş bibo daha asan hem kî seba wendoxan ke wendiş û parekerdiş bibo daha rehet. Coka ma bi zerrîweşîye dîzayn û tayê fonksîyonê DêrsimInfoyî vurnay. Cêr ra bi kilmekî fonksîyon û eyarê neweyî îzeh benê.

Ma hêvîdar îme ke nika ra hem wendişê meqaleyan hem kî nuştişê şîroveyan beno tenêna atraktîf. Ma tîya (îta) ra wendox û nuştoxanê mayê erjayan rê sipas kenîme û angajmanê şima bi keyfweşîye pawenîme.

Şima bimanê weşîye de,

Redaksîyon.

Çi vurîya?

• Keyepel
  Seke yeno dîyene, rîyê keyepelê DêrsimInfoyî dîzaynêde newe girewto. Binê resimanê xeberanê muhîman (slîder) de nika kategorîyî ney, la pêro xeberê aktuelî goreyê tarîxê weşanayîşî rêz benê. Nîya wendoxî şikînê pêro xeberanê neweyan reyê de bivîne û meylê xo ra gore weçînê, biwanê. Tîya (îta) ra kî merdim (mordem) besekeno asayîşê xeberan bivurno: têbin de ya kî têlewe.
  Heto raşt de kî menû esto ke tede xeberê ke tewr zaf amey wendene, şîroveyê peyênî û nuşteyê neweyî yê blogê DêrsimInfoyî yenê musnayene.

• Navîgasyon
  Kategorîyî nika navîgasyonê sere resimanê keyepelî (slider) de ca cênê. Uca (uza) ra xeberî kategorîyanê verênan ra gore yenê dîyene. Meqaleyê nuştoxan binê nuqteyê “Fikr û Vate”yî de yenê dîyene. Blogê DêrsimInfoyî kî menûyo tewr rast der o.
  Sernavîgasyon ke serê logoyî de aseno, nê beşan pêşkêş keno:
• Vîdeo: Qisimê vîdeoyan ê DêrsimInfoyî.
• Muzîk TV: Cinitoxê muzîkî yo otomatîkî yê DêrsimTV. DêrsimInfo ser o biwanê û hemdem muzîkê DêrsimTV goşdar bikerê.
• Dosya 1938: Na beşe de pêro nuşte, vîdeo û meqale ke mewzûyê înan jenosîdê Dêrsimî yê serranê 1937-38 o, yenê dîyene.
• Xerîta: Xerîtaya vîrtuelî ya DêrsimInfoyî (sîtemap). Tîya (îta) de pêro muhtewaya keyepelî ju (yew) awir de yena dîyene.
• Tagî: “Tag” çekuyêda îngilizkî ya û yena ra manaya “parola”. Hema-hema her nuşteyê DêrsimInfoyî girêdayeyê ju (yew) tagî yo. Înan ra cigêrayîş, sayekerdiş û tesnîfkerdişê nuşteyan beno daha rehet.
• Têkilî: Eke şima wazenê fikr, rexne, nuşte ûsn. ma rê birusnê ya kî zobîna (sewbîna) sebeban ra ma de bikuyê îrtîbat, noca (naza) de formulero qijkek esto ke şima besekenê pirr bikerê û ma rê birusnê. Çiqas ke mumkîn o, ma desinde şima û ricaya şima de eleqedar benîme.

• Meqaleyî
  Jê (sey) verî, her nuşte de nuştoxê/a meqaleyî û opsîyonê parekerdişî (mesela Facebookî ser o) yenê dîyene. Çîyêde newe o yo ke nika heto çep ê her nuşteyî de mewzûyê bînî asenê ke tede meqaleyê ke manenê ro jubînî (yewbînan), yenê musnayene. Binê her nuşteyî de kî pêşnîyazî nîşan benê. Tîya (îta) de nuşteyê bînî ke beno ke bala wendoxî/e ancenê (oncenê), yenê musnayene.
  Aye ra kî dot êndî merdim (mordem) besekeno şîroveyê xo dîrekt Facebookî ra binuso. Xebitnayox ke hesabê xo yê Facebookî de qeydkerde yo, şikîno nîya nuşteyan şîrove bikero. Helbet her kes kî jê (sey) verî besekeno şîroveyî bê hesabê Facebookî keyepel ser o binuso.
  Ferhengo înteraktîf hîna her nuşteyî de bi rengo kewe yeno dîyene û hîna tercumeyî bi tirkî û îngilizkî yê.

• Blog
  Qisimo nîp-newe yê DêrsimInfoyî blog o. Blog dinyaya Întenetî de tîpêde rojnuşte yo. Blogê DêrsimInfoyî de edîtor û redaktorê ma pêro dinya ra meqale û nuşteyî derheqê kurd û Kurdîstanî de anê pêser, çînenê we û dima pare kenê. Yanî, her çîyo ke jê (sey) xebere nêame weşanayene ya bi zonêde (ziwanêde) bîn o ya kî sirf tena geşkerdişê munaqeşeyî rê xizmet keno, blogê ma de ca cêno. Blog nîya beno cayêde pêserameyîşê fikr û zanayîşî.
  Pêro wendoxî dawetkerde yê ke fikrê xo şîroveyanê blogî de ma de pare bikerê.