Franck Ribéry futbolbazo milî ye Fransa yo ke tewr zêde pere qezenc keno. Çiqas ke kupayê futbolî yê dinya ke Afrîkaya Başûrî de ca girewt, rind kay nêkerd, bi (ebe) ekîbê xo Bavyera Munîh de o sey (jê) verî hîna estare yo. Franck Ribéry kayê xo de hêrişkar o, zaf vozeno û futbol ra xeylê pere qezenc keno.
Heto bîn ra kî Franck Ribéry nê hewteyan Parîs de vejîno vere mehkeme, çike o serra 2009 de bi yew (ju) çêneka (kêneka) ke 18 serran ra qije bîya, hotelê de ameyo têlewe û aye de kot ra. Mehkeme hîna qerarê xo nêda, hama federasyonê futbolî yê Fransa Franck Ribéry kadroyê xo ra eşt teber û bi na game karîyerê Franck Ribéry ekîbê milî yê Fransa de qedîya. Çêneke Zahîa Dehar nika 18 serre der a û di serram ra ver bi Franck Ribéry ame naskerdene. Peynîya vurnayîşê Franck Ribéry bi ekîbo alman Bavyera Munîh, Zahîa di reyî ameya Munîh û bi Franck Ribéry hotelê Kempînskî de ameya têlewe. A roje roja 26. yê mayaxorabîyayîşê Franck Ribéry bîye û aye kî ey rê xelatêda rindeke bîye. Nika mehkeme herinayoxê biletê Zahîa saye kena. Eke Franck Ribéry no bilet bi xo herina, tepîya no yeno a mana ke ey kî zanayêne ke na çêneke o wext 18 serre ra qije bîya. O wext mehkeme Franck Ribéry heta 3 serrî erzena zere. Zahîa Dehar va ke a nêzanena ke kamî biletê aye girewto.
Teyna (tena) Franck Ribéry ney, kaykerdoxê bînê fransizî kî no dewa de gumankerde yê. Zahîa Dehar kena eşkera ke aye bi 16serrîya xo yew kulub de raver futbolbazê Karîm Benzema û Sîdney Govou nas kerdêne. Hîrêmene (her hîrêyan) kî aye de amey têlewe û aye de kote ra. Yew şewe bi Zahîa 2.000 Euro ya û a bi huyayîş vana ke “Seba wextêde kilm 500 Euro cêna.”
