Hunermend û sîyasetkaro dêrsimij Ferhat Tunçî pêgirewtişê sîyasetkaranê kurdan protesto kerd û serekwezîrê Tirkîya Tayyîp Erdogan rexne kerd. Tunçî va ke vizêr lîsteya serekwezîra kane Tanus Çîller estbîye, nameyê ke na lîste ser o bîyê, ê ju bi ju (yew bi yew) amey kiştene. Ewro kî goreyê lîsteya Erdoganî kurdî yenê pêgirewtene.
Tunç: “Vizêr ma ameyêne kiştene, ewro kî zere erzînîme. Eke mesela kurdan nêna hel kerdene, mesela demokrasî kî hel nêbena. Ê wazenê ke şarî werteyê AKP û CHP pare bikerê. Ma kî vanîme ke CHP û AKP ju (yew) yê, qet ferqê înan çin o. Gerek ma duştê nê kayî de alternatîfêde girs vejîme. Êndî qewetê xo lete-lete mekerîme, wa bîyarîme têlewe.”
Serranê 1990an de lîsteyî hetê hukmatê Komara Tirkîya ra ameybî nuştene. Nê lîsteyan ser o nameyê xeylê cênc, tucar, roşnvîr û sîyasetkaran estbîbî ke jê (sey) netîce ameybî kiştene ya kî vîndî kerdene. Enformasyonê Komela Heqanê Însanan ÎHD ra gore ê serran de 20.000 ra zêde kurdî ameybî qetl kerdene. Demê hukmatê AKP de kî 4.000 sîyasetkarê kurdî amey eştene bi hepisxaneyan. Xeylê pisporanê sîyasetî ra gore dewleta Tirkîya duştê gamanê nêmserbestîya zonê (ziwanê) kurdkî û rakerdişê kanalêde televîzyonî de hîna wazena ke sîyasetê xo yê ke kurdan heqanê xo ra mehrum bikero, biramo.
