Îdîaya tayê dêrsimijan ra gore Kamer Genc û CHPijan bînan Ferhat Tunçî ser o vato ke milet ray medo Tunçî, çike o Tirkîya parçe keno. Naye ser o Ferhat Tunçî Pilemurîye de cewab da û va: “Kamer Genc hetê dewlete keno. O ju (yew) pîyon o ke karê xo o yo ke kultur, zon (ziwan) û îtîqadê şarê xo bivurno.”
Ferhat Tunçî turê xo yê weçînitişî Pilemurîye de dewam kerd. Xeylê cinî û cêncî dormeyê Ferhat Tunçî de bîy top û bi esnafê Pilemurîye qisey kerd. Pilemurîye ra tepîya Tunçî heşt dewî zîyaret kerd û sîyasetê xo da nas kerdene. Dewijê ke nêzdîyê Buyer Bawayî der ê, eleqeyêda girse musnaye Ferhat Tunçî û ey de gerreyê Kamer Gencî kerd. Nê dewijan Tunçî ra va ke, Kamer Genc fek erzeno Tunçî û vano ke o Tirkîya keno parçe. Dewijan kî kerd eşkera ke ê pê Kamer Gencî bawer nêbenê û dest danê Ferhat Tunçî.
Ferhat Tunçî kî dewijan de nîya qisey kerd: “26 serrî yo ke Kamer Genc Pilemurîye ra ray cêno. Şima bêrê û qayîtê Pilemurîye û Nazmîye bikerê. Her di qezayî kî her roje benê qij, benê bê însan. Ey soz da ke şarê ma tîya (îta) kar bicêro, labelê Kamer Gencî tena qorîcîyî ardê noca (naza). O hetê dewlete der o, ez hetê şarê xo de.”
