Yew serr a ke futbolbazo dêrsimij Denîz Nakî ekîbê Almanya SC Paderborn ra transferê ekîbê Tirkîya “Ankara Gençlerbirliği” bîyo. Nika Nakî bazar şan de antrenman ra dima rastê hêrişê faşîstan bî.
Yew roportaj bi rojnameyê almanî Die Welt Nakî va ke her çî nêm serre ra ver dest kerd ci. “Şeş aşmî yo ke mi Facebook ser o her roje 10-15 tehdîd û milqî girewtêne. Derheqê deqê mi, derheqê dînê mi de bîy. Peyamî hesabanê sexteyan ra bîy ke dima ra amey pak kerdene. Mi o wext xo bi xo va ke beno ke milqanê anonîman ra teber kî çîyê beno.”
“Şeş aşmî yo ke mi tehdîdî girewtêne”
Nakî mesela roja bazarî nîya arde ziwan: “Normal de ez Anqara de tesîsanê klubî de maneno, la peyê hewteyî ez meymanê yew hevalê xo bîyo. Şan de mi o rast kerd keyeyê xo, çike mi waşt xo rê çîyê seba werdene bîyarî. Ez ke şîyo, xafil de uca hîrê kesî mi dima ra bîy, ez teqib kerdo. Mi dima veng da va ke: ‘Nakîyo elewîyo kurd, ti ya?’ Veramîyay mi ser û dormeyê mi girewt. Înan elewîyî û kurdîya mi rê nengî çinitî.” Cumleyê ke yenê Denîz Nakî vîr, înan ra yew “Çayê bazîyê to ser o Tuncelî ney, Dêrsim nusîno?” Hêrişkerdoxan ra yew girmike daye Nakî ro, tepîya futbolbaz peyser da piro û ceribna ke uca ra biremo. Denîz Nakî va ke “Înan mi ra dima ancîya zirçay va ke Dî (Dewleta Îslamî) şima kurdan rê se bikero. Ti welatê ma ra def be şo!”
Nakî nê hêrişî ra dima qerar da ke racêro Almanya û îstîfaya xo yê Gençlerbîrlîgî daye.
Denîz Nakî Almanya de ame dinya. May û pîyê ey Dêrsim ra yê.
