Referandumê Fasî de hema-hema pêro weçînitoxan seba vurnayîşê qanûno bingeyî yê welatî ray day. Aye ra Qiral Muhamedî soz da ke tayê reformî bêrê kerdene.
Fas de zafêrîya şarî şîye sindoqan û ray da ke qanûno bingeyî bêro vurnayene. 98,5 % ê weçînitoxan referandum de xeylê reformî waştî. Reforman ra gore qiral Muhamed parçeyê hukmatê xo caverdano, labelê serekê eskerîye maneno û şikîno parlamento hewa no. Mewzûyanê dînî û edalet de kî qeraro peyên ê qiralî yo. Zonê (ziwanê) berberkî, yanî amazîxkî, leweyê erebkî de beno zono (ziwanê) resmî.
Pê no reform şaro berber ê Fasî statuyo resmî cêno ke êndî her cayê heyatî jê (sey) sîyaset, dîplomasî, perwerde, ekonomî ûsn. de şaranê bînan de têduşt o. Referandum ra tepîya berberî (amazîxî) besekenê 317 dibistanan de zonê (ziwanê) xo yê dayîke de perwerde bivînê. Zereyê panc (ponc) serran de kî mekteb, lîse û unîversîteyan de perwerde bi berberkî beno mumkin.
Referandumê Fasî bitaybetî welatanê Afrîkaya Vakurî de ame teqîb kerdene. Qiral Muhamedî reformî protestoyan ra dime qebul kerdî. Feqet protestoyê Fasî jê (sey) êyê Misir û Tunisî çîp nêbîy.
Fas kî xeylê babetan de bi mutefîqanê xo yê rojawanî de pîya gureyeno, mesela persa terorî de. La duştê pêro raverşîyayîş de heyat de ferqê feqir û zengînan hîna zaf girs o, rîayetkerdişê heqanê merdiman (mordeman) de kî hîna zaf problemî estê. Fas monarşîya parlamenter a. Qiral Muhamedo 47serre serra 1999 bîyo qiralê Fasî, raver ra pîyê xo 38serrî hukmat ramitîbî.
