Dêvê medyaya sosyale Facebook axir çêberê (keyberê) xo seba sermayegozaranê pêroyî keno ra û kûno borsa.
Heşt serran ra dime keyepelê Facebookî kûno borsa. Henî aseno ke pêşnîyaza verêne ra gore Facebook 5 mîlyar Dollarî cêno, yanî kapîtîlazyonê borsa do dorê 80-100 Dollarî de bo. Na hûmare manena ro erja borsa ya şîrketê McDonald’s. Labelê ferqê Facebookî no yo ke şîrketê Înternetî de sirf 3.000 karkerî gureyenê. Naye ra gore serra 2011 keda her karkerî karê şîrketî de 1,2 mîlyon Dollarî bîye.
Analîstan ra gore xebitnayoxê Facebookî kî rolê (sey) karkeran kay kenê, çike ê seba kesanê bînan muhtewa û erje nanê sîte ra. Eslê xo de kî karker û sermaygozarê Facebookî zerekotişê borsa ra şenik kar kenê. Awanker û sermîyanê şîrketî Mark Zuckerberg 28% yê senedan cêno, yanî erja para xo do 28 mîlyar Dollarî bibo.
Facebook her çî ra raver bi reklamo taybetî kar keno. Nê reklamî goreyê tarz û tehmê xebitnayoxî/e yenê viraştene. Mesela, keso ke zaf-zaf ju (yew) mewzû ser o nuseno û çîyê pare keno, o kes kî Facebook ser o do derheqê nê çîyî de reklam bivîno.
