Çar serrî yo ke erja zerrnî ke trendêde devacêrî de bena kêmî. No hewte zerrn pîyase de resa erja xo ya tewr qije. Sey serra 2010 de, zerrn borsa de bi 1.088 $ ra ame rotene.
Roja 20. temmuze de Shanghaî Gold Exchange de xafil de bi konraktan 5 tonî zerrn ameyî rotene. Bi nê rotişî, zerrn wexto kilm de 4% erje kerde vîndî.
Çayê?
Bitaybetî hamnonê 2014 ra nat berzbîyayîşê Dollarê Amerîka zerrn ser o tesîrêde depresîf kerd peyda. Seba ke zerrn û Dollarî verapey girêdaye yê, berzbîyayîşê Dollarî ra erja zerrnî kota. Sebeb o yo ke pîyaseyanê mîyanneteweyî de bazirganîya zerrnî bi Dollar ra yena kerdene.
Heto bîn ra kî dorûverê dinyaya fînansî ra gore texmîn beno ke emser gerek faîzê DYA berz bo. Na game kî atraksîyonê zerrnî kena kêmî, çike sermayegozarî kapîtalê xo hîna zaf kenê zereyê tehwîlan (bonds).
Ney ra kî dot, dewleta Çînî ya ke wazena dovîzê xo bikero dovîzê rezerveyî, goreyê texmînan ra coka gerek jêde zerrn biherno. Raporê Bankayê Şarê Çînî ra gore, Çîn tena wayîrê 1,658 tonî zerrnî yo. Analîstan ra gore na hûmare 3.500 ton ê. Na nakokîye bawerîya sermayegozaran seba zerrn şikite, pîyaseyan de zerrn çîp ame rotene.
Analîstanê ke erja zerrnî dormeyê 5.000 $ de prognoz kerdêne, nika qalê kursanê binê 1.000 $ de kenê. Beno ke wexto kilm de zerrn bikûyo binê sînorê psîkolojîko muhîm ê 1.000 $. Seweta ke ekonomîya Amerîka rind gureyena û bankaya merjezî emser û serrna karê xo keno berz, beno ke zerrn tena 2017 ra tepîya erja xo jêde bikero. Êlûla 2011 de erja zerrnî 1.920 Dollar bîya.
Rezerveyê zerrnî, welatî ra gore:
DYA: 8,133 tonî
Almanya: 3,384 tonî
Fransa: 2,435 tonî
Çîn: 1,658 tonî
Rûsya: 1,148 tonî
Swîs: 1,040 tonî
