Çend hewteyê pêrodayîşî ra dime, çeteyê Taliban peynîye de kewtî paytextê Efxanîstan Kabul. Medya û çapemenî de resimê vila bî ke tede çeteyî zereyê seraya serekkomar Eşref Xanî de nişenê ro. Çend saetî verî serekkomarî welatê xo ra remabî.
Se bî?
Bi qerarê serekkomarê DYA Joe Bidenî, vîşt serran ra dime aşma gulana 2021î de leşkeranê DYA dest kerdbî ci ke welat biteriknê. Desinde naye ra dime, çeteyê îslamîstanê Taliban erzîyayî 400 qezayanê welatî û bi hewayêdo çîp şaristan û merkezê efxanî îşgal kerdî. Artêşa Efxanîstanî besenêkerd verênîye ro çeteyan bicêro.
Rêxistana terorîstan Taliban da zanayene ke înan cengê Efxanîstanî “qedêna”. Meqsedê înan o ke Efxanîstan biçarnê bikerê mîreyîya îslamîste. Welat de kêmneteweyî, cinî û pêro hêzê demokrat û azadîperwerî nika tersenê ke binê dîktatorîya Taliban de şidet, teda, tecawuz û zulm do reyna racêro welato ke çend des serrî binê cengan de nalayêne. Bi hezaran kesî remenê ceribnenê welat biteriknê.
Heyetê Asayîşî yê Neteweyanê Yewbîyayeyan kombîyayîşo lez virazeno. Welatê Ewropa û DYA nika lezabez kenê ke ekîp û hemwelatîyanê xo Efxanîstanî ra raxelesnê peyser bîyarê.
