Tirkîya de serebûtê goninî dewam kenê. İnegöl ra tepîya nika kî qezaya Hatayî de serebûtêde girs qewimîya.
Çapemenîya tirk û kurde ra gore vizêr Dörtyol de hêrişê muridîya asayîşî de çar polîsî amey kiştene. No serebût ra tepîya panc (ponc) sey tirkî ke hetê îdeolojî ra faşîzan ya kî rastgir bîy, amey verê qereqol, çike înan ê hîrê kesî ke raver ra ameybî pêgirewtene, waştêne teber bikerê. Rojnameyanê tirkan sey (jê) Zaman çapik nuştîbî ke dayîreyê polîsî yê Dörtyolî hetê çekdaran ra ame hêriskerdene û ke uca (uza) de hîrê hêrişkarî hetê polîsî ra amey pêgirewtene. Tirkanê vere banê (bonê) polîsê Dörtyolî de waşt ke înan lînç bikerê. No semed ra xeylê polîs û eskeran tifongî na hewa ra ke kes zere mekûyo.
Dima faşîstê tirkî amey pêser û şîy verê banê partîya BDP. Uca de çêberî (keyberî) amey şikitene, kemerî amey eştene. Faşîzanî tepîya şîy zere û çîyê BDP pencere ra eştî teber, ser o kî ofîsê BDP ame veşnayene. No ban de yew (ju) alaya girs a Tirkîya ameye hewanayene. Xeylê qewexane û dikanê kurdan amey axmekerdene û veşnayene. Qewexanedarê kurdî Osman Baybars va ke “Rîyê sîyasetê nijadperestî yê hukmatî ra serebûtê nîyanênî vejînê meydan. Polîsî kotî yê, dewlete kotî ya? Înan ez çayê nêsevekna?”
Walîyê Hatayî naye ra tepîya bi (ebe) lerze (leze) rojnameyan rê da zanayene ke kesî hêrişê dayîrê polîsî nêkerdo û ê hîrê kesê ke amey pêgirewtene, sucdar nêbîy û no semed ra hîrêmîne (her hîrêyan) kî amey raverdayene. No beyan de walîyêHatayî nîya vano: “Ma wazenîme ke xebera xelete ke tayê rojnameyan de weşanîyaya, rast bikerîme. Kes bi çekanê otomatîkan hêrişê banê polîse Dörtyolî nêkerd. Înan ra kî kes nêame pêgirewtene. Hîrê gumankerdeyî kî sucdar nêbîy û amey raverdayene.”
Aşmeyanê peyênan de rojnameyanê Tirkîya, bitaybetî rojnameyanê ke nêzdîyê AKP der ê, xeylê xeberê zurayî nuştêne. Însan vano qey her het waştoxê girsbîyayîşê serebûtanê goninan o. Tayê kurd û tirkî ewro qezaya Dörtyolî de day pêro. Di cêncê kurdî hetê faşîzananê sîvîlan ra bi çekan bîy dirbetinî. Dörtyol de bi hezaran kurdî amey pêser. Tayê dikanî kî hetê cêncanê kurdan ra amey axmekerdene.
