Weçinîtîsî seba dîktatoran ju enstrumento hêca yo. Ebe weçinitisan dîktatorî besekenê hêzê xo pêt kerê û xo meşrû bikerê. Weçinitisî teyna wexto kilm de seba dîktatoran ju rîzîkoyo berz ê, wexto derg de seba înan henî xeternak nîyê. Weçinitîs û ebe banê weçinitîsî dîktatorî besekenê muxalefetê xo notralîze bikerê. Wextê weçinitîsî de ê şîkînê endamê xo ra taxan pirr bikerê û aparatanê esker û polîsî her ca de bimusnê. Nîya hêzê xo hetê sarî ra yeno dîyene û nîya sar kî hurmet ro “serek”î keno. No seba partîyanê muxalefetî kî ju sîgnal o: Gamanê xo rind berzê, sima kî vînenê mi de kay nêbeno.
Seba riznayîsê dîktatoran, rojî, heşteyî, asmî û serrê weçinitisî muhîm ê. Qewet, organîzebîyena û hemkarîya partîyanê muxalefetî seba riznayîsê dîktatoran faktorê muhîm ê. Tirêm muxalefet şîkîno sarî bîyaro teber? Besekenê sar û çalakîyan rind koordîne bikerê? Wayîrê televîzyon ya kî radyoyan yê? Şîkînê medya rind û tesîrdar bigurenê? Binê dîktatorîye de nê çîyî honde rehet nîyê.
Dîktatorî û mekanîzmayê ci nêverdanê ke sar kuçeyan de protestoyan virazê. Nê sebebî ra “çalakîyê muşterekî” seba partîyanê muxalefetî problemêde girs o. No kî teyna ebe koordînasyonê pêro hêzanê ke duştê dîktatorî der ê, beno.
Ney ra kî dot felaketê xozayî û krîzê ekonomî katalîzatorêde pêt o. Eke wertê muxalefetî ra ju kile vejîya, ê bînî kî dime ra sonê. Çike her game şansê serkotebîyene beno berz. Nîya raya “çalakîya muştereke” bena ra. Mordem ganî bîyaro zon ke eke badê weçininîtîsî ju vilaweka taybetîye derheqê zarîya dîktatorî de ya kî pêtîya muxalefet ser o est bo, no sarî rê cesaret dano û nîya sar vejîno taxan.
Serra 1989î de kampanyayê weçinitîsî seba partîyanê antî-kommunîstan bîyê ju raya roştî ya ke mobîlîzasyonê muxalefetî tey ardo. Peynîye de, ebe koordînasyonêde efektîf û biaqil rijîyayîsê rejîmê kommunîstî de reşt peynîye. Ukranya 2013 kî ney rê nimûneyo rindeko bîn o.
