No hewte dewleta Tirkîya juna (yewna) sondajê awbendan bi (ebe) nameyê “Bozkaya 1 Barajı” sifte kerd. Labelê makîneyê karî û dozerî eynî roje mecbur mend ke gurayîşê xo caverdê. Çike Mamekîye ra dorê 700 dêrsimijî amey santîye û nêverday ke karkerê awbendî bigurîyê.
Naye ser o fîrmaya awbendî eskerîye rê telefon kerd û demê ra dime eskerî amey dormeyê santîye girewt. Barajo newe yê “Bozkaya 1” nêzdîyê dewa Pîlvankî de yeno viraştene. Dewa Pîlvankî Mamekîye ra des kîlometreyî dûrî ya. Badê ke şarê Dêrsimî xebere girewte ke barajêde newe yeno viraştene, sûka Mamekîye de bi hoparlor anons virazîya, milet bî top şî santîya barajî. Dorê hezar kirmancan vera eskeran de xo eşt makînayan ver û gurayîş vinderna. Tayê cêncan kî pê kemeran tayê makînayî kerdî xirabinî.
Sereka beledîya Mamekîye kî ameye santîye û serekê fîrma de bi kilmekîye qisey kerd. Patronê fîrma soz da ke karê sondajî vindernenê û makîneyî ancîya (onca) o ca ra ancenê (oncenê).
Sereka beledîyaya Mamekîye Edîbe Şahîn (BDP) uca (uza) de verê hezar kesan de qisey kerd. Edîbe Şahîn qeseyê xo de va ke “Ma îta (tîya) ra veng danîme, biqerar îme. Ma nika nêverdanîme ke qet ju (yew) awbend bêro viraştene. Ewro xebera ser o ke 5 deqayan de bîye vilaye, hende însanî amey pêser. Eke ma heta nika vengê xo xo ra nêvet, rîyê sozan ra bî ke ma rê amey dayene. (…) Sebrê ma êndî beno teng. (…) Dêrsim de her kes organîzebîyaye yo, zaneno ke senî pîya cewab bido. Nika ra tepîya guneyê ma bi qet ju (yew) karker, muhendîs û emegdar ke yeno naza (noca), nêno. Nika ra tepîya ma yo sebrteng bîme. (…) Ma tarîxê xo da na zaf dîye. Axir ma destûrê barajêde newe nêdanîme, koçer nêbenîme, kî nêdanîme koçer kerdene.”
