Tam 16 rojî Dêrsim de ancîya birrî veşnayî. Peynîye de, bi mucadeleyê dêrsimijan, adir ame binê kontrolî ardene.
Di hewteyan ra ver, qezayanê Dêrsimî Xozat û Mamekîye de eskeranê tirkan operasyonanê xo de dar û berê Dêrsimî veşna. Dewleta Tirkîya na polîtîkaya xo vîyarte de kî bi kar ardbîye. Nîya wazenê xozaya Kurdîstanî bixeripnê ke milet welatê xo terk bikero û leşkerê kurdî besenêkerê birr de sitare bivînê.
Sey netîceyê şewatê dewlete, di hewteyî têde birr û parka milîye xeylê zerar dî. Bi hektaran darî veşayî, nebat û heywanî kî tede. Serekê Baroyê Dêrsimî Bariş Yildirimî rojnameyê Duvarî de qisey kerd no derheq de va ke “Parka milîye de 1.800 tewirê nebatî û beranê endemîkan xeylê zerar dî”. Dewa Sînî ya Mamekîye de di dêrsimijî, Xidir Zeytin û Raîme Çinar, rîyê dûyê adiran ra axû werd û ameyî berdene nêweşxaneyî.
Şarî mudaxeleyê adirî kerd
Çi esto ke mudaxelekerdoxê şewatî ne îtfaîya ne kî hêzê dewlete bîyî. Dêrsimijan bi xo di hewteyî mucadele kerd ke adir weşaynê. Herçiqas ke şarî Mudirîya Birrî ya dewlete rê waştiş rusna ke hewa ra mudaxeleyê adirî bikerê, qet cewab nêameyo. Hetta walîyê Dêrsimî yê tirkan Tuncel Sonelî zurî kerd û îddîa kerd ke şewatêde girs çin o.
Pêro pîya 56 rêxistinî û xeylê zerrîwazan goreyê îmkananê xo mudaxeleyê adirî kerd. Tede kî hunermendo dêrsimij Ferhat Tunç estbî ke medyaya sosyale de derheqê qehremanîya dêrsimijan de vilaweke daye: “Nê yê qehremanê ke bi hewayêde tarîxî birrê ma felaketê adirî ra xelesnayî ra. Bi rike û cesaretêde girs ma cengê ver bi kilan ramit û peynîye de Dêrsim serkewte vejîya. Ez zerrîya her kesî paç kena. Ciwîyayîş xoverrodayîş o!” Werteyê zerrîwazan de serekê şaredarî yê Xozatî yo kan Cevdet Konak kî estbî. Konakî va ke “Merkezê Dêrsimî û dormeyê ci de şar lebitîya ke adir cayanê bînan vila nêbo. Eslê xo de gerek bî ke hewa ra mudaxele bibo. La beledîya ra qet wasayît mintiqaya şewatî nêşîyo. Ge-ge yewê vejîya tumê ser û fotograf ant, hende. Yanî, qet beledîya mudaxele nêkena.”
