8. gulane Dêrsim de kiştişê di kesan Licê de, meydanê Seyîd Riza yê Mamekîye de ame protesto kerdene. Hemserekê beledîya Mehmet Alî Bul û Nurhayat Altun, endamê rêxistinanê bînan û xeylê hemwelatî beşdarê nûmayîşê protestoyî bîy. Protestokerdoxan sloganê sey “Xo ver bide Licê, Dêrsim bi to yo” û “Merdeyê Licê bêmerg ê” amey eştene.
Meydanê Seyîd Rizayî de hemserekê qeza yê Dêrsimî Ergîn Dogruyî hukmatê AKP rexne kerd va ke AKP Kurdîstan de gonîya kurdan rişnena. Goreyê xebera DÎHA, werteyê tayê protestokerdoxan û hêzanê polîsî de pêrodayîş vejîya. Polîsî bi gazê îsotî û awe mudaxele kerd, xortan kî xirxî û kokteylê molotovî eştî. Sey netîce, new kesî binê nezaretî der ê.
Seba cêncanê ke binê nezaretê polîsî der ê, verê Midurîya Asayîşî de yew çalakîya roniştişî ameye kerdene. Bi seyan wendekarî ewro Unîversîteya Dêrsimî ra ver bi Midurîya Asayîşî şîy. Nûmayîş de sloganî amey eştene ke “Kurdîstan nêbeno mezela faşîzmî.”
