Neway serr ê ke dewleta tirke seba menfaatê xo rojevan vurneno, manîpulasyonan keno. Nîyetê xo binê perdeyê nê manîpulasyonan de nimitneno.
Atatirk ateîst bî, seba menfaatê nîjadperestîya xo dînê îslamî zaf pê kar ard, nîjadperestîya tirke ebe no hal kerd hukum. Ge-ge destê şêx û seyîdan lew kerd, ge-ge çim qirpna homoseksuelan. Pîrika mi seba nê nimûnan ge-ge vate ke “Domanê şarî îtweled ê!”
Dek û dolabê tirkan serê milayîm û duristîya ma de zaf çarnayî. Hîle û kayo peyên çend serrî yo ke “turban û qurban” o.
Kaykerdoxo peyên Erdogan o.
Ez vana “peyên”, hama bawer kena ke peyên bo. No kay, yê nê kayî puç kerdene, girêdayê ma û şarê ma wo.
Ax şarê ma, şarê ma!
Şo, 24 seatî camîye de mevecîye teber, kam to ra vano çi, Erdogan? Xanima to hem turban sarê xo ra girê do, hem “qurban”, kam şima ra vano çi?
Yê to kay o, kay!
Ti ke heq û huqûq seveknena, qey heqê perwerdeyê zonê ma qebul nêkena? To ra heq-huqûq, ma rê puqûq!
Meke Tayîbo… zaf ayîb o!
“One minute”, lo! He-hey biko biko…!
“Bidirne ero!”
De ma xo rê tayê mobet kenîme, çîyê megêrê serê xo!
Ma “birayê jumin îme” lo!
To ke vato, “Ma perwerdeyê zonê birayî (!) qebul nêkenîme” ,wa henî bo! Vate û emrê to çarixê mi ser!
Emrê towo bîn? Qelî wazena? Germîya nîskan?
Şerm meke, biwaze, emir bike, mordem “birayê xo yê koleyî” de şerm keno, cîgera m’?!
Dem û dewran vurîya, vurîya!
Nika, ma ebe şima leqe kenîme.
Welew ke! Mordem bibo wezîr, hama mebo rezîl.
Şima binê nê barê zurekerîye de dêm dînê şone.
Ma ti mecbur a nê zuran bikerê?
Willeyî, Homa bo ke ti tayê mecbur a.
Bingeyê na dewlete serê înkarê ma de peyda bîya.
Eh! De ti zanena ke înkar bi xo zur a.
Domanê “îtîhati terrakî” bi nameyê nîjadperestîya tirke nê zuran kenê. Ti, bi nameyê îslamî kena.
Ge-ge bi nameyê îslamî, ge-ge bi nameyê nîjadperestîya tirke, no kayê şima wa neway serr ê ke dewam keno.
Ebe markayê îşliga Kiliçdarogluyî û turbanî û kinc û tumanan şima mecbur ê kay bikerê. Manîpulasyon û zurekerîye adetê şima wo.
Şima nêweş ê, nêweş!
Ma kî kewtîme bindestê nê nêweşan. Tesîrê na nêweşîye şarê ma kerdo lete-lete. Şima ke mi ra pers bikerê, dawaya ma tesîrê na nêweşîye ra vecîyene wa. Ju şar, ju kes ke rastîya xo ra bivisîyo, o şar, o kes nêweş o.
Meletijî zaf nêweş ê, xarpêtijî, mereşijî, erzinganijî, rihayijî, tayê kî çewligijî hîna nêweş ê.
“Dîn” vanê, “îman” vanê, hama AKP wa ke kamîya înan, rastîya înan, heqê perwerdeyê zonê înan qebul nêkena. Aye seveknenê. AKP ra naye pers nêkenê, “Na kerdena şima karê dîn û îmanî yo?”
Nê naye pers nêkenê, qey?
Nêweşîya înkarî nînan kerde nêweşî.
Asîmîlasyon bi namêyê îslamî û bi nameyê nîjadperestîya tirkan nê cayan de zê xençer xorî kewto sêne. Tayê sûkan de “panîslamîzm”, tayê şaristanan de “pantirkîzm”.
“Turban û qurban” kayê na nêweşî ya.
Derdê Erdoganî turban û qurban nîyo ke…
Reyna ragêrî vateyê pîrika xo. Aye ge-ge se vate?
Şima vajê, ez qefelîya…
Îlhamî Sertkaya
keko tarîxê cumhurîyetî ra natî tay islamîstî tirk şarê bajaran ke to humariti,seba dîn êynan bikaranê u çepgîrî tirk zi şarê mayo dersimijî xapinêni..seba qedexekerdenê ziwan u kulturê ma yew fikre êynan baş u demoqratikî çinyo!!wexta ke to qalê kulturê xo u ziwanê xo kerd çepgîrî u îslamîstî êynan benî yew u tore vanî boluci u nêzana nê çîyan..endî ma gani no hewn u giranî ra hişyar bibî u wayirê xo bivêjî..
Ne panislamîzm neki pantîrkizm milete Kurdi qedeneno. Milete Kurd zerya xode gonya sehidino xoye Seyid Rizay, Sex Seid u ibini esta.
15 serre ravede polise Tirki mira bine iskenceyde vatbike, endi zone sima, kultire sima qediyo, sima pöre bene Tirki. Labele na 15 serre de sare Kurdi amey xoser, xeyle raye guret. Na dewlete u polisuna inura 15 serre tepiya vanke, ey milakete xiravini nu zon zone Xiziro, zone jiyarino, zone Seyide mao, zone Sixe mao, no citur qedino. DInya qedina hama na zon nikedino. Na sonde mawa Seyide Welat u Sixe Welate ro.