Goreyê Merkezê Çapemenî yê YPG ra, sînoranê rojawanî yê kantonê Cizîre de operasyonê YPG û YPJ dewam kenê.
Vilaweke de yeno vatene ke 7 çeteyê terorîstanê “Dewleta Îslamî” (DÎ) ameyî kiştene. Vizêr hêzanê YPG kî Hesekê de dewê Mişêrfa û Aşra azad kerdbîyî. Boyna, YPG seba azadkerdişê dewanê Xanat û Emero yê Hesekê abîşew operasyonî kerdî. Tede tewr tay hîrê çeteyî ameyî kiştene. Operasyono bîn de dewê Lîfaf, Ehmedê Kino, Mala Ehmet Xelef, Mala Ebû Xelef û Mala Naîf Xelîl azad kerdî. Naye de hûmara merdeyanê DÎ nêna zanayene.
Kobanê de kî YPG hêzanê Suvar Al Raqqa de pîya operasyon viraşt ke rojhelatê kantonê Kobanê de dew û warê Kartêlî azad bikerê. Bitaybetî tumê Kartêlî mevkîyêde stratejîk o. Nê operasyonî de 15 çeteyî ameyî kiştene, meyîtê 9 kî destê YPG der ê. Yew cengdarê YPG şehîd kewt.
