Çimê Daka Leyla yakerde şî

Raştî kî nê rojan oncîya hewrê sîyayî şarê ma ser ro cêrenê. Şarê ma hona daka Leyla nêdabîye hardê dewrêşî ke, terorîstanê DAÎŞ hêrişê Pirsûsî kerd.

Heya, oncîya sîya der îme bawo, şîn der îme dayê, wayê, bira.. şiware der îme heval! Dejê ma rê, janê ma rê kes derman nêbeno, cîran. Kezeba man a ke bîya hîris û di leteyî,  kezeba man a ke bîya hîris û di parçeyî, kam pîşeno bira, kam? Şîn û şiwarê ma rê her kes bîyo ker û lal…

Şîn û şiwarê ma rê her kes bîyo ker û lal

Qetlîamê Pirsûsî zereyê ma kerd lete-lete, cîgerê ma kerdî hurdî-hurdî û veşnayî. Oncîya qetlîam, oncîya zulm, oncîya gonî û goneşîr, oncîya terorîstanê DAÎŞ însanê bêsuc û bêgunayî qetl kerdî. Nê teroristanê bênamusan oncîya canê ma ra can guret. Hîris û di canê ma, hîris û di azeb û xortê ma, hîris û di gulê ma ma ra visnayî û berdî. Ma hezar reyî nalet biwanîme kî, ma hezar reyî şermezar bikerîme kî, ma se vacîme kî, nê terorîstanê DAÎŞ rê şenik o. Oncîya kî aj û amênê nê naletmendan re nalet wanenîme, tu kenîme bi rîyê cisnê nê şeytanan.

Hîris û di can-cîgeranê xo ver de kî bejna xo kenîme çewt û înan bi rûmet yad kenîme, şehîdê ma rûmeta ma yê û şehîdî nêmirenê!

Seke şima kî zanenê, anê rojanê verî daka Leyla şîye heqîya xo. Mi kî teze de dest bi nê nuşteyê xo kerdîbî ke na xebera sîyaye, xebera qetlîamê Pirsûsî zê bomba zereyê mezgê ma de teqe. No sebeb ra kî mi no nuşteyê xo nême de caverda, ez o oncîya kî kilmek tayê çîyan derheqê daka Leyla de binusî.

Kam se vano wa vaco, çimê daka Leyla yakerde şî

virana Dêrsimî de şîye heqîya xo

Çi heyf ke daka Leyla kî bêveng helalîya xo waşte û werteyê qom û cîranê xo ra şîye. Seke yeno zanitene, çênaya Sey Rizayî daka Leyla Aglar-Polate 15. temuze edi Dêrsim de koç kerd û şîye heqîya xo. Na rey a zulmê dewleta tirke ver nêşîyêne surgin, la na rey welatê bav û kalanê xo de, edi Dêrsim de, werteyê qomê xo de, werteyê zav û zêçê xo de xatirê xo waşt û bêveng şîye. La çi heyf ke çimê xo kî yakerde şî.

Domananê Sey Rizayî ra juye a hona heyat de bîye. Daka Leyla serra 1918 de edi Dêrsim de ama rîyê dinya. 97 serrî bîye û qetlîamê 1937-38 ê Dêrsim de çênekêda azebe bîya. Qetlîamê Dêrsimî de edi Dereyê Laçî de a bi ju waya xo hîrê rojî ra tepîya binê 40 meyîtanê mordemanê xo ra birîndar xelesînê ra. Nê qetlîam û îdamê pîyê xo Sey Rizayî ra dime 5 serrî kî leweyê eskeranê suwarî de hepsî manena û xeylê zahmet û zulm vînena.

Daka Leyla bi derd û kulanê xo, bi ax û waxa pî û birayê xo, bi merex û bîrîye, bi hesret û axe şîye. 77 serrî ke çimê xo ray û dirban de bî. Aye mezela pî û barayê xo nêdîye. 77 serrî ke hesîrî çimanê aye de nêvinetî. Zulmkaran derdê pî û birayî dabîyî aye. Xora a kî bi nê derd û merexî merde.

Çîyo ke bî, daka Leyla Dêrsim terk nêkerd. Herçiqas ke mordemê aye vanê “ma de bê” kî, a nêşona û vana “Ez Dêrsim ra nêvecîna” Raştî kî aye Dêrsim nêterkit, çiqas ke çimê daka Leyla yakerde şî kî, welatê pî û birayê xo de, yanî virana Dêrsimî de şîye heqîya xo. Cayê xo wa werteyê gul û nurî de û werteyê gul û sosinanê koyanê Dêrsimî de bo!