Şîrketê petrolî yê dinya no taw bi hukmatê Kurdîstanê Başûrî peymanan îmza kenê. Fîrmayanê DYA Chevron û Exxon Mobîl ra dime kî fransiz Total besekeno Kurdîstan de ro petrol û gazê erdî bicêro. No hewte kî şîrketê uris Gazprom Neft bi hukmatê Herêma Kurdîstanî ra peymana dozkerdiş û vetişê petrolî îmza kerd.
Gazprom Neft mintiqa Germîyan de şîrketê Kanada Western Zagros ra pîya xebetîno, para 40% yê petrolî cêno uca ra. Şakal de kî Gazprom beno wayîrê para 80%. Melumatan ra gore mesrefê projeyê cigêrayîş û vetişê petrolî seba Gazprom dorê 260 mîlyon Dollaran der ê, heta serra 2015 de kî ancîya 150 mîlyon Dollarî yenê ra ser. Labelê kapasîteyê çimeyan da-500 mîlyon ton ê, coka bi îhtîmalêde girs Gazprom no proje ra kar keno.
Kurdîstanê Başûrî wayîrê 45 mîlyar varîl rezerveyê petrolî yo. Xeylê çimeyê gaz û hîdrokarbon Kurdîstan de estê. Heta nika nêzdîyê 40 şîrketê mîyanneteweyî Kurdîstanê Başûrî de petrol saye kenê, la pêro nê şîrketî qijkek ê. Yew aşme de şîrketanê tewr girsan ê dinya Chevron, Exxon Mobîl, Total û Gazprom verê xo da Hewlêr. Hewlêr, heto bîn ra, ameyeyê petrolî duştê qanûnê federalî de bi Bexdad pare nêkeno, tehdîdê Bexdadî kî ro qerarê şîrketan tesîr nêkenê.
