Seba ke Çemê Pêrre yê Qisle (Nazmîye) de awbend yeno viraştene, tebîet ci ra zeraro girs cêno. Semedê awanîya awbendî ra xeylê candarê awe çin benê. Bitaybetî maseyê çemî sebebê kêmasîya oksîjenî ra mirenê.
Çemê Pêrre Dêrsim Qisle ra heta sînoranê Çewlîgî şono. Awbendê Pembelîkî ra dime nika barajo dîyin bi nameyê Seyrantepeyî yeno viraştene. Gelîya Pêrre de melumatê dewijan ra gore awanîya barajî zeraro girs da dorûverê çemî. Xeberan ra gore, wexto ke qapaxê barajî yenê cadayene, pêro candarî, bitaybetî maseyî ke binê çemî de ciwînê, qir benê. Aye ra kî dot, seba ke awa çemî vindena, bin de vîrus û bakterîyî zêdînê. Gama ke awe ancîya dîyena şîyene, nê pêro bakterîyî tey şonê û nîya zerar danê nebat û heywananê ke muhtacê çemî yê.
Aşma gulane û hezîrane de verê gola awbendê Seyrantepeyî de bi hezaran maseyê merdeyî amey dîyene. Henî aseno ke maseyan seba ke oksîjenî nêdî, merdî. Dêrsimijî nika wazenê ke merdişê maseyan ser o cigêrayîş bêro kerdene.
Yewna tesîro negatîf ê barajî o yo ke semedê awanîye ra dewê ke raver ra cîranê yewbînan bîbîy, nika besenêkenê ke biresê yewbînî. Nika dewijî mecbur ê ke bi saetan raya bîne ra bicêrê ke biresê cîrananê xo. Bitaybetî, wexto ke kokim û nêweşî wazenê şêrê doktoran het, semedê awbendan ra zehmetîya girane ancenê.
Qisle de kî sey cayanê bînan ê Dêrsim de, duştê pêro protesto û çalakîyan de viraştişê awbendan dewam beno. Cendirme û dadgehan xeylê protestokerdoxî girewtîbî binê nezaretî. Dewayî amey rakerdene ke aktîvîstî 10 serran ya kî zêde bicêrê. Sîyasetê awbendan ê Komara Tirkîya hîna ke dewam keno, tebîeto rindek û bêemsal ê kurdan giran-giran yeno xeripnayene.
