Xebera rojnameyê DYA New York Timesî ra gore vîrusê Sars-Cov-19î tewr zaf hewa ra vêreno ra leşa merdimî. Merkezê Kontrolkerdiş û Seveknayîşî yê Nêweşîyan ê DYA (CDC) ard ziwan ke destpirakerdişê rîyê çîyan ra rîskê girewtişê Covîd-19î tena 10.000 ra 1 kêmî yo. Sereka CDCî Rochelle Walensky naye ser o va “Eke merdim dest çî û cayanê qilêrinan ra no, beno ke bikewo binê tesîrê vîrusî, la rîskê girewtişê enfeksîyonî na raye ra nizm o.”
Zafane bawer bî ke merdimo ke dest na cayêk ra, uca ra desinde vîrus cêno. Çi esto ke no rîsk tena cayanê ke înan ser o vîrus teze ame dayene, tede esto. Mavajîme yewna kes kuxa destê xo, bi nê destî nano destikê çêberî ra, şima kî demêdo kilm ra dime dest nanê nê destik û tepîya destê xo benê çim, fek ya kî pirnika xo, o wext rîskê girewtişê enfeksîyonî esto. La bi xebera CDCî bellî beno ke mecbur nîyo ke merdim her çî hertim dezenfekte bikero.
Ancîya, dormeyê xo pak veradayîş û rey-rey destanê xo şutiş seba weşîya merdimî rind o, çike vîrusan ra qederî teber ra xeylê bakterî û madeyê bînî estê. Pêşnîyaza CDCî ya ke destanê xo bi awe û sabun şutene û maske piradayene rîskê girewtişê Covîd-19î kenê kêmî. Yanî, zafêrîya senaryoyanê cuya rojanîye de xebitnayena madeyanê kîmyayîyan lazim nîya. Mîkrobîyolojîstê Unîversîteya Rutgersî kî no derheq de vano ke merdim vîrus zafane hewa ra cêno, rîyê çîyan ra ney. Coka, tedbîrê tewr muhîmî maske û mesafegirewtiş ê.
