Sempozyumê “Prosesanê Çareserî û Muzakeran de Rolê Lîderan” de ke roja 13.01.2013 Îstanbul de ca girewt, xeylê panelîstî, sîyasetkar, cigêrayox, nuştoxî ûsn. beşdar bîy.
Panelê “Derbazkerdişê Bêçareserîya Mesela Kurdan: Mucadeleya Azadî ya Kurdan” de panelîstî hemsereka BDP Gultan Kişanak, akademîsyen Mesut Yegen, nuştoxe Nuray Mert û sosyolog Îsmaîl Beşîkçî bîy. Nê qiseykerdişî de bitaybetî qalê Îsmaîl Beşîkçî bala goşdaran ante.
Beşîkçî ra gore problemê kurdan tena mesela Tirkîya nîya, la mesela Rojhelatê Mîyanên û Nêzdî yo. Beşîkçî: “MY de kî mesela tewr muhîme bîye Kurdîstan. Dewletanê MY amey pê ke Kurdîstan awan nêbo. Kurdî kerdî çar parçe.”
Dewamê qiseykerdişê xo de Beşîkçî tevgerê kurd û antî-kurdî yê dewletanê dinya na têver ro, sey netîce kî va: “Merdim ke mesela kurdan de muzakere vano, gerek îttîfaqê mîyanneteweyî yo antî-kurd xo vîr ra mekero.”
Beşîkçî kî rexneyê BDP kerd: “Goreyê texmînanê mi, dinya ser o 50 mîlyon kurdî ciwînê. Û dewleta înan çin a. Na senî neheqî ya? Labelê tîya de kî para BDP esta. Vanê, ma dewleta xosere nêwazenîme. Eke şima ala û dewlete nêwazenê, şima de yew seqetîye esta.”
Salon de wekîlê BDP sey hemsereke Gultan Kişanan, Ayla Akat, Emîne Ayna û Sebahat Tuncel na qisa ser o tenê huyay.
Qiseye rast, siyasetkare kurde cewt…. Besikci ney mara ney siyasetkare kurdi na persi bikero. Milete ma dewlete vazene, siyasetkare partiye ma nivazene. Cike reheteya inu niya rinda, cefe xok niya rindo.