Berlîn de Tirkîya kota bin

Maço ke xeylê xeyranan ra ame pînayene (pawitene), roja 08.10.2010 saeta 20:45 de (demê Ewropaya mîyanêne) Berlîn de ca girewt. Ekîbê milî yê Tirkîya û Almanya seba kalîfîkasyonê şampîyonîya Ewropa kotê têver. Peynîya peynîye de Almanya bi 3:0 kote ser.

Pêro bîletê nê maçî rew ameybî rotene û pêro pîya 74.244 însanî stadê Olîmpîya yê Berlînî de dutşê jubînî (yewbînî) de kotê kay. Esnaya maçî de xeyranê alman û tirkan xeylê hîsdar bîyêne. Plasmanê ekîbê Almanya de futbolbazo muhîm Sebastîan Schweînsteîgerî rîyê seqetîya xo besenêkerd ke kay bikero, hurendîya (herinda) ey de futbolbazo cênc Tonî Kroos vejîya sahe. Hetê Tirkîya de antrenorê hollandayijî Guus Hîddîngî futbolbazê lîgê hîrêyinî yê Almanya ra Şahîn û birayê Altintopî day kay kerdene.

Her di ekîban virênî de defansîf kay kerd, rîzîko nêgirewt û gude leteyê xo de çarna. Tirkîya heta golo juyin (yewin) tenêna aktîf kay kerd, Hîddîngî kaykerdoxê xo bi taktîkêde hêrişkar ardîbî stad. Deqaya 42. de Almanya bi tenê şanş û talî golê xo dî. Kaptan Lahmî heto rast ra werteyê xo kerd ra, estareyê Bavyera Munîhî Mullerî tope sareyê (sereyê) xo ra da tope ro, gude şîyo reşt serê dîrege û ame sareyê (sereyê) kaykerdoxê forvetî Kloseyî ke axir pê qafike gol eşt.

Leteyo dîyin de Almanya xeylê ciraameyîye bîye. Gude xo ra emîn çarna, pasê xo şî hurendî û Ozîl vera kîndarîya xeyrananê Tirkîya de kayê xo ard meydan. Deqaya 70. de Mesut Ozîlî îmkanê xo dî, voşt û bi linga xoya çepe golo dîyin ê Almanya eşt. Deqaya 87. de na ray reyna Kloseyî xeletîya kalevanê Tirkîya ra tope sêneyê xo ra eşte xo ver û werteyê palanê kalevanî ra kerde zere. 3:0.

Ekîbê Tirkîya no maç de besenêkerd ke kayê xo rind organîze bikero. Seyrkerdoxî vatêne qey di birayî Altintopî  no kay de çin bîy. Almanya de kalevan Manuel Neuerî, goleştox Mîroslav Klose û Mesut Ozîl estareyê nê maçî bîy. Na grûbe de Almanya cayê xoyo juyinî (yewinî) tenêna sabît sevekna, cayo dîyin de bikotişê Tirkîya ra tepîya Awusturya esta.

Çiqas ke maç bi xo zêde (jêde) biheyecan û bihereket ranêvêrdo, maç ra ver kî dişmenîya reqiban ya kî eke merdim (mordem) tikêna baldar nîyabido, ê xeyranan vejîyaybî meydan. Bitaybetî futbolbazê ekîbê Almanya Mesut Ozîlî xo çapemenîyade hêrişkar a Tirkîya ver dîyo. Mesut Ozîlî ra ju (yew) rojnamegerî ancîya (onca) pers kerdîbî ke çira seba Tirkîya kay nêkeno. Mesutî kî va, eke ju (yew) welat esto ke tede futbol kay bikero, o kî Almanya ya. Seke ame dîyene, no cewab qayîlê xeyrananê Tirkîya nêşî, wa maç ra ver heta peynîye Ozîl hetê xeylê xeyrananê Tirkîya ra bi (ebe) fîtikan ame protesto kerdene. Hîsdarî û kîndarîya xeylê xeyrananê Tirkîya henî bellî bî ke zafane 2:0 ra tepîya stad ra vejîyay.

Serekwezîrê komara Tirkîya Tayyîp Erdogan, şansolyeya Almanyaya Federale Angela Merkel û serekkomarê Almanya Chrîstîan Wulf kî mêmanê maçî bîy.