Seke yeno zanayene, hewn însan hem keno rindek hem kî weş. Labelê zerarê bêhewnîye hîna zaf girs o. Pisporê îngilizî ê unîversîteya Warwickî vanê, kam ke serran ra şeş saetan ra kêmî kûno (keweno) ra, rîzîkoyê xo yê krîzê zerrî bi 48 % beno zêde. Rîzîkoyê felçî kî bi 15 % beno zêde.
Cigêrayîşê pisporan heşt welatan de bi 47.000 kesan ra ke mabênê 7 û 25 serre der ê, ame viraştene. Aye ra gore hewno kilmek ke demêde derg ser o henî mendo, viraştişê hormon û madeyanê bînan ê wucudî rê dest dano ke nê zerar danê damaran û însan kenê goştin.
Problemê hereyrakotişî girs o, labelê heyato ewroyên de karê însanî henî zaf o ke zafane kes saeta rewe de hewn a nêşono. Feqet zêde hewn kî zaf weş nîyo. Pisporan ra gore gerek her kes xo gore bivîno ke çend saetî hewn xo rê bes o yan ney. Tayê însanan rê tebîî hewnê şeş saetan bes o, labelê kam ke şodirane xo rind nêvîneno û tey qefilnaye vejeno, gerek xeyrê weşîya xo rê tikêna rakuyo (rakewo).
