Sermayegozarîyê ecnebî Kurdîstanê Başûrî de reştî 39 bîlyon Dollarî. Nika kî qanûn yeno vurnayene ke sermayegozarî hîna rehet yenê Kurdîstan.
Goreyê serekê heyetê îdareyî yê sermayegozarîyan bitaybetî sektorê endustrî, zîret, turîzm û emlakan Herêma Kurdîstanî de şîy raver. Pêro pîya reqemê sermayegozaran emser reşt 39,2 bîlyon Dollarî.
Nînan ra yew kî projeyo girs ê endustrî yo ke Silêmanî de yeno viraştene: fabrîkaya asinî. Fabrîka hewteyo verên ame rakerdene û Rojhelato Mîyanên de fabrîkayanê tewr girsan ra yew a. Aye ra kî dot projeyê girsî yê turîzmî Hewlêrî de estê. Melumatan ra gore nînan ra qedêrî Herêma Kurdîstanî de hukmat rakerdişê bankaya ziretî plan keno ke nîya rencber û şiwaneyî besekenê rehet kredîyan bicêrê.
Goreyê stastîkanê heyetê îdareyî ra, heta ewro 680 destûrê sermayegozarîyan amey dayene, nînan ra 20 tenê ecnebî yê. Nika yew qanûno newe amade beno ke nîya duwelan ra karsazî hîna rehet Kurdîstan de sermaye bikerê. Xora, no taw xeylê şîrketê girsî yê petrolî Kurdîstanê Başûrî de kar kenê, nînan tede ExxonMobîl, Chevron, Total, Gazprom ûsn.
Labelê yew heto bîn ê sermayegozarîyan kî esto. Goreyê Yewîya Sermayegozarîyan a Kurdîstanî ra semedê pênêameyîşê hukmatî û problemanê parlamentoyî ra pereyê projeyan bî kêmî. Eslê xo de 10 bîlyon $ seba sermayegozarîyan hezir bîy, labelê seba ke hukmat hîna peyda nêbîyo û ser o kî bi Bexdadî problemê butçe vejîya meydan, pere û projeyî amey vindernayene.
