Başûr: Gelo Referandumê Xoserîye Amade Beno?

Serekê Herêma Federal a Kurdîstanî Mesûd Barzanî planê xo seba xoserîya Kurdîstanê Başûrî ard ziwan. Seba naye texmîn beno ke nêzdî de Herême do di referandumî bêrê kerdene.

Wexto ke Barzanî raywanîya xo ya zîyaretkerdişê welatanê Ewropa û DYA ra cêrabî ra, hewteyo peyên bi partîyanê sîyasîyan ê Herême de ameyo têlewe ke netîceyê raywanîya xo bido zanayene. Melumatan ra gore, Barzanî va ke dewaya xoserîya kurdan nika rojeva mîyanneteweyî der a. Seba serfirazîya naye, ganî têkilîya zereyî ya Herêma Kurdîstanî pêt bo. “Ez bawer kena ke partîyê kurdî ney zanenê û hende amade yê ke na mesele de berpirsîyarîya xo ya neteweyî bîyarê ca. Gerek ma pê usûlê huqûqî, zereyê qanûnê bingeyî yê Îraqî de biresîme hedefê xo; ma rê referandum lazim o ke gelo welatêde xoser ê kurdan do estbo yan ney”, Barzanî va.

Barzanî: Gerek ma pê qanûnê bingeyî yê Îraqî biresîme Xoserîye

BasNews texmîn keno ke hukmatê Herêma Federale nika planê referandumî ser o gureyeno. Tede mintiqayê Kurdîstanê Başûrî ke goreyê maddeyê 140. yê qanûnê bingeyî yê Îraqî ra resmî zereyê Herême de nîyê, ê mintiqayî kî mewzû benê. Partîya Gorranî û di partîyê îslamî yê Herêma Kurdîstanî ard ziwan ke organîzekerdişê referandumî no taw wezîfeyêda zor a. Partîyan ra gore viraştişê qanûnê bingeyî seba dewleta kurdan a ameyoxe hîna muhîm o.

Çi esto ke Partîya Demokrat a Kurdîstanî (PDK) û Yewîya Neteweyî ya Kurdîstanî (YNK) bi israr plan ser o vindenê. Nê di partîyan ra gore wext wextê referandumî yo. Çimeyê zereyê YNK BasNewsî rê da zanayene ke munaqeşeyê xoserîye nê di partîyî tenêna kerdî nêzdîyê yewbînan. Bitaybetî Hetkarê Serekî Qubad Talabanî ke bi xo çend serrî endamê YNK o, dest dana peymana stratejîk a di partîyan. Talabanî ra gore gerek têkilîya mabênê PDK û YNK de rind bo ke Herêma Kurdîstanî de problemî nêvejîyê.

Meseleya Referandumî PDK û YNK ARDî têlewe

Yewna nuqteyê meseleya xoserîye, pozîsyonê Îranî yo. Têkilîya YNK bi Îran ke rind a, nêzdîbîyayîşê di partîyan persan vejeno meydan. Goreyê çimeyê BasNewsî ra, Komara Îranî fehm kerd ke Îraq êdî bîyo hîrê parçeyî: kurdî, erebê şîî û sunîyî. Hêvîya Îranî ya ke kurdî û şîîyan bîyaro xo het, çike sînorê Îranî bi sunîyan çin o. Coka beno ke Îran sey welato verên xoserîya Kurdîstanê Başûrî tesdîq keno.