Serekê Herêma Kurdîstanî Mesûd Barzanî yew roportajê bi ajansê xeberan BBC de va ke referandumê xoserîya Herêma Kurdîstanî Kurdîstanê Başûrî de tena “mesela çend aşman a.”
Roportajê xo de Barzanî va: “Ez nika besenêkena tarîxêde qetî bidî, labelê tena mesela çend aşman a.” Derheqê referandumî de Barzanî da zanayene ke qerar yê Parlamentoyê Kurdîstanî yo. Boyna, Barzanî ard ziwan ke xoserîya şarê kurdî heqê ey o tebîî yo. Pêro serûbetanê peyênan ê Îraqî musna ke dewleta xoser a kurdan mecburî yo. “Nika ra tepîya ma hedefê xo yê xoserîye nênimenîme.”
“Îraq bîlfîîl lete bîyo. Gelo ma na rewşa trajedîk a Îraqî de bimanîme? (…) Mumkîn nîyo ke ma racêro halo verên, ma nêşikînîme reyna desna serrî bi qederê xo kay bikerîme. Ma êdî rehîneyê îstîqbalêde nêzanayeyî nîyîme”, Barzanî dewamê roportajî de va. “Kurdîstanê Xoserî kesî rê tehdîd nîyo. Bi cîrananê xo ma do têkilîyanê rindan ronîme.”
Vateyê Mesûd Barzanî çapemenîya kurde de henî yenê dîyene ke letebîyayîşê Îraqî êdî meselêda qetî ya. Yew aşm a ke rêxistina terorîste Dewleta Îslamî ya Îraq û Şamî (DÎÎŞ) ke sey hermeyê El Qaîde yena hesibnayene, Heleb ra bi Dîyala yew dewleta xoser a Îslamî îlan kerde. Goreyê reqemê Yewîya Miletan ra aşma hezîrane de Îraq de 2.417 kesî merdî – nînan tede 1.500 kesê sîvîlî. Sey cewab, pêşmergeyan Kerkûk û parçeyê bînî yê Kurdîstanê Başûrî ard binê kontrolê xo.
