Serekê Herêma Federal a Kurdîstanî Mesûd Barzanî reyna da zanayene ke qet yew dewlete besenêkena verênîya xoserîya Kurdîstanî bigîro.
Mesûd Barzanî ke redaktoranê farsan ê “Voice of Amerika” de pîya reportaj kerd, va ke na dinya ser o şaranê bindestan ra zêde kes xoserîye heq nêkeno. Seba wedaritişê nê problemî partîyî do bêrê têlewe û yewbînî de qisey bikerê, pêrodayîş teba çareser nêkeno. Derheqê xoserîya Kurdîstanî de serekê PDK nîya qisey kerd: “Ma raya xo ra emîn û bi keyfweşîye şonîme. Racêrayîş ma çimî de opsîyon nîyo. Nê sinorî kilitê azadîya şarê min ê.”
Mesûd Barzanî derheqê serekwezîrê Îraqî Haydar al-Abadî de, ke Waşîngtin zîyaret kerdbî, va ke “No zîyaret zaf lazim bî. No zîyaret do Hewlêr û Bexdad bîyaro nêzdî, la ma nêfikirîyîme ke tena semedê nê dîyarî ra problemê ke 2003 ra bi nat estê, desinde hel benê.”
“QEDERÊ KURDAN KESÎ RÊ NÊVERDANÎME”
Tepîya Mesûd Barzanî da zanayene ke îşgalkerdişê Mûsilî hetê terorîstanê “Dewleta Îslamî” (DÎ) ra seba her kesî tehlukeyêde girs o, seba Kurdîstanî kî. “No sebeb ra ma bi Bexdad tayê peymanî kerdî. Ma qederê kurdan kesêde xerîb rê nêverdanîme.”
Peynîya reportajî de Mesûd Barzanî va, “Ez yew kulturo ke xo sey pêşmerge name keno, ey ra yena. Ma domanîya xo ra musayîme ke seba edalet û rastîye pêro bidîme. Ewro kî tornê mi pêşmergeyan de pîya danê pêro. Coka wa DÎ bizano ke, ê kesê verên nîyê ke wazenê Kurdîstanî bikerê binê bandura xo.”
