Fînlanda û Swêd semedê ceng û dagirkerîya Rûsya ra wazenê herbî bibê endamê NATO, labelê Tirkîya ney bloke kena. Sebebê blokeyê Tirkîya kî nê yê: çekî, kurdî û propagandaya weçînitişî.
Çi heyf o ke seserra 21. de kî hîna kurdan ser o bazirganîye virajîna. Kilame kilama kan a: kurdî ke parçe-parçe yê, wayîrê dewlete nîyê, besenêkenê dewlete ronê ya kî bêrê cîdîgirewtene. Erdê kurdan 100 serrî yo ke binê dagirkerîya çar dewletan o. Eke kurdî dewlete bibîyêne, welatanê rojawanî û bitaybetî NATO hetê kurdan kerdêne. Nê semedî ra Tirkîya asan sîyasetê antî-kurdan ana ver, no enstruman kî heta nika sîyasetê zereyî de rind gurîno. Eke sereyê hukmatan dezayî, înan hêrişê kurdan kerd. Nika kî Erdogan Fînlanda û Swêd ra kurdan ser o qesey keno, wazeno ke heqê kurdan bêro peysergirewtene û çend kurdî teslîmê Tirkîya bibê.
Nê waştişî yew problem peyda kenê, çike NATO ano ra ziwan ke ê Ukranya de seba demokrasî û heqanê merdiman danê pêro, ke Ukranya erjanê rojawanî duştê Rûsya de temsîl kena. Her kes zaneno ke kurdî her çar parçeyanê Kurdîstan de erj û prensîbanê demokrasî û rojawanî temsîl kenê û serba sîstemêde demokratîk danê pêro. Heto bîn ra Tirkîya armanc kena ke ambargoyê çekanê ke hetê Swêd û Fînlanda ra verba Tirkîya amebî ronayene, înan wedaro. Semedê hêriş û dagirkerîya Tirkîya ya bi Kurdîstanê Rojawanî ra nê di dewletan no ambargo îlan kerdbî. Ney ra kî dot Tirkîya bi na karte wazena ke DYA astengê rotişê jetanê F-16 û F-35 ca verdê. Tîya de pisporî anê ra ziwan ke DYA eslê xo de wazenê nê çekan biroşê Tirkîya.
Seba ke weçînitişê Tirkîya beno nêzdî û Erdogan zar aseno, ey rê serebutê serkewtişî lazim ê. Heto yew ra enflasyon, heto bîn ra xirabinşîyena ekonomî Erdogan û partîya ci rê bîyê sebebê vîndîkerdena xeylê rayan. Coka bi aşman o ke Erdogan ceribneno uzmê nê problemî vejîyo û ney sîyasetê zereyî de bixebitno, herçiqas ke rîskê nê kayî girs bo kî.
